Халаан уутуттан эмсэҕэлээбит Нам улууһун олохтоохторо “Мои документы” элбэх өҥөнү оҥорор киин уонна “Госуслуги” портал нөҥүө дьиэлэрин уонна тус докумуоннарын чөлүгэр түһэриэхтэрэ.
Бүгүн Дьокуускайтан икки тустаах специалист Хатырыкка тиийэн үлэлэһиэхтээҕин МФЦ салайааччыта Дария Парникова-Румм чопчулуур. Ол курдук, МФЦ специалистара Хатырыкка ыам ыйын 20-26 күннэригэр орто оскуолаҕа; Граф Биэрэгэр Намнааҕы техникумҥа ыам ыйын 22-26 күннэригэр; Маймаҕаҕа култуурнай-спорт комплекска ыам ыйын 22 күнүгэр; Модукка култуурнай-спорт комплекска ыам ыйын 23 күнүгэр олохтоохтортон сайабылыанньа ылыахтара. Чопчу иһитиннэриилэри 8-800-100-22-16 нүөмэргэ эрийэн билсиэххэ сөп.
Оттон ыам ыйын 22 күнүгэр Дьокуускайтан иккис бөлөх тута Граф Биэрэгэр ааһыаҕа. Ону тэҥэ, специалистары кытта ИДьМ-тан тахсан олохтоохтор паспордарын чөлүгэр түһэриэхтэрэ. Бэлиэтээн эттэххэ, паспоры ИДьМ нөҥүө уоннааҕы буорту буолбут бары докумуоннары МФЦ-га уларытыллар.
“Ыксаллаах быһыыга-майгыга түбэспиттэр докумуоннарын уларытарга, ол иһигэр көмө харчы ылалларыгар сайабылыанньаларын «Госуслуги» порталга биэриэхтэрэ. Оттон интернеттэрэ, госуслугалара, телефона суох дьоннор биһиги кииммитигэр кэлиэхтэрэ. Сэрэдэҕэ “Мои документы” киин үлэһиттэрэ Маймаҕаҕа, чэппиэргэ Модукка үлэлии айанныахтара. Бу нэдиэлэҕэ эмсэҕэлээбит нэһилиэктэргэ үлэлиэхпит”, – диир салайааччы Дария Таммивна.
Харысхан Попов