Кулун тутар 15-16 күннэригэр улууспутугар СӨ мелодистарын ассоциациятын чилиэнэ, СӨ култууратын туйгуна, Хомустаах 2-с нэһилиэгэр «Түһүлгэ» СК дириэктэрдээбит, олохтоох мелодист, аккомпаниатор А.П. Меркулов төрөөбүтэ 65 сылыгар анаммыт икки күннээх тэрээһин буолан ааста.
Бастакы күн М.К. Аммосов аатынан култуура Дыбарыаһыгар «Музыка абыгар ылларан» өрөспүүбүлүкэтээҕи ырыа күрэҕэ 3 түһүмэҕинэн ыытылынна. Оҕолорго 5-10 саастарыгар диэри уонна улахан дьоҥҥо биирдиилээн, ансаамбылынан диэн түмүк тахсыбыта. Дьүүллүүр сүбэҕэ — Саргылана Адамова, РФ театральнай деятеллэрин союһун чилиэнэ, СӨ култуураҕа уонна духуобунай сайдыыга министерствотын ресурснай-бырайыактыыр киинин режиссера, СӨ култууратын үтүөлээх үлэһитэ, СӨ ырыа айааччыларын союһун чилиэнэ, Христофор Максимов фондун чилиэнэ, Дмитрий Барабанов, «Коробейниктар» вокальнай ырыа народнай ансаамбылын салайааччыта, Андрей Замятин, СӨ култууратын туйгуна, РФ суруналыыстарын сойууһун чилиэнэ, СӨ ырыа айааччыларын сойууһун чилиэнэ, Нам улууһун, Ленскэй, Хатыҥ Арыы нэһилиэктэрин бочуоттаах олохтооҕо, ырыаһыт, ырыа айааччы, Нам улууһун «Туллук хаара» мелодистарын түмсүүтүн салайааччыта, Алексей Потапов, СӨ култууратын туйгуна, республика ырыа айааччыларын союһун чилиэнэ, СӨ аккордеонистарын уонна гармонистарын союһун региональнай общественнай тэрилтэтин председатэлэ, «Эйгэ» айар хамсааһын салайааччыта уонна А.П. Меркулов төрөппүт кыыһа Екатерина Прокопьева үлэлээтилэр. Күрэххэ уопсайа 69 киһи кытынна. Оҕолорго Гран-при үрдүк аатын, Хомустаах 2-с нэһилиэгиттэн сылдьар 9 саастаах кэскиллээх ырыаһыт Егорова Милиана ылла (сал. А. Старков). Улахан дьоҥҥо Гран – при буоллулар: Бүлүүттэн сылдьар Матрена Сивцева. Вокальнай ансаамбылларга – “Сырдык сүүрээн” Мэҥэ Хаҥалас улууһун 1 Баатара нэһилиэгиттэн (сал. Ноев.В.В.). Талааннаах ырыаһыттар араас номинацияларынан бэлиэтэннилэр. Кэрэ ырыа түһүлгэтэ кыттааччылары уонна көрөөччүлэри сэргэхситтэ, истиҥ дуоһуйууну бэлэхтээтэ.
Иккис күн Александр Петрович үлээбит, олорбут 2 Хомустаах нэһилиэгэр «Ырыа – дууһам иэйиитэ» диэн ааттаах ахтыы уонна “Музыка абыгар ылларан” кинигэтин 2-с таһаарыытын бэлиэтээһин киэһэтэ буолан ааста. Кинигэҕэ ырыа куттаах, дэгиттэр талааннаах Александр Меркулов олоҕун, айар үлэтин туһунан, дьиэ кэргэнин, үөлээннээхтэрин, култуура эйгэтигэр өр сылларга үлэлээбит доҕотторун ахтыылара, ону тэҥэ кини айбыт ырыалара нотаҕа тиһиллэн киирдилэр. Автор ырыалара музыка абыгар ылларан төрөөбүт дойдутун айылҕатын хоһуйан, дьонугар сэргэтигэр истиҥ тапталын иэйиилээхтик туойаллар. Кинигэ самодеятельнай бөлөхтөргө , музыкальнай оскуолаларга уонна бары ырыаны таптааччыларга ананар. Кинигэ «Дани Алмас» ООО хампаанньа кинигэ кыһатыгар 150 ахсаанынан 2024 с. бэчээттэнэн таҕыста. Ахтыы киэһэтигэр ыраахтан биир дойдулаахтара — Өймөкөөнтөн, Чурапчыттан, Уус-Алдантан бииргэ алтыспыт, үөрэммит доҕотторо, Торуойга бииргэ үлэлээбит дьонноро иһирэхтик, ис сүрэхтэн ахтан, ырыа ыллаан дуоһуйан тарҕастылар. Александр Петрович айан, суруйан хаалларбыт ырыалара ыллана, бар дьонун кэрэҕэ, сырдыкка кынаттыы туруоҕа диэн эрэнэбит. Бу икки күннээх тэрээһиннэргэ көмөлөспүт, күүс-көмө буолбут дьоннорбутугар, бары спонсордарга улахан махталбытын тиэрдэбит.
Елена Слепцова, нэһилиэк библиотекара.