Нам улууһугар, «Хаарбах туруктаах дьиэттэн дьону көһөрүү» программанан, Ленскэй нэһилиэккэ 10-ча кэриҥэ элбэх квартиралаах дьиэлэр тутуулара түмүктэнэн, үлэҕэ киирэн саҕалаатылар.
“Нам улууһугар 2025 сылтан “Хаарбах дьиэттэн дьону көһөрүү” III түһүмэҕэ саҕаланыаҕа. Улууска биир даҕаны хаарбах туруктаах элбэх квартиралаах дьиэ хаалыа суохтаах диэн күүстээх сыал-сорук турар”, – диир Нам улууһун баһылыга Юрий Слепцов.
Бүгүн Нам сэлиэнньэтин олохтоохторугар Ленскэй уулуссаҕа 4 квартиралаах дьиэ аанын аһар үөрүүлээх күнэ үүннэ. Толору хааччыллыылаах дьиэни «Стройуниверсал» ХЭТ тутта. Саҥа дьиэҕэ Нам, Арбын ыаллара көһөн киириэхтэрэ.
Ол курдук, дьон-сэргэ олохторун саҥа дьиэҕэ киирэн оҥостоллоругар Россия Президенэ Владимир Путин тус бэйэтинэн национальнай программаны толкуйдаабыта, олоххо киллэрбитэ этиллэр. Дьиэ үөрүүлээх арыллыытын үгэнигэр Нам улууһун баһылыга Юрий Слепцов, Ленскэй нэһилиэк баһылыга Петр Сокольников олохтоохтору эҕэрдэлээтилэр. Ону тэҥэ, көһөн киириэхтээх Нам, Арбын ыалларыгар дьиэҕэ сөптөөх бэлэх-туһах туттарылынна.
“Толору хааччыллыылаах дьиэ квартиралара хаһаайыттарын буллулар. Кэлэн иһэр Саҥа дьыл киннилэргэ үөрүүнү-көтүүнү аҕаллын! Президент Путин Владимир Владимирович, Ил Дархан Николаев Айсен Сергеевич, улуус баһылыга Слепцов Юрий Иннокентьевич үлэлэрин ситимэ, үлэ сырата буолар. Ленскэй нэһилиэккэ инникитин 10-ча саҥа дьиэ киирээри бэлэмнэнэрин бэлиэтээн тураммын, сылаас, үөрүү-көтүү аргыстаах саҥа дьиэ куруук ыалдьыттардаах буоллун”, – диэн эҕэрдэлиир баһылык Петр Григорьевич.
Ольга Иннокентьевна Иванова, Арбын олохтооҕо:
— Россия Президенэ Владимир Владимирович Путин үчүгэй программаны киллэрэн төһөлөөх элбэх киһи дьиэлэнэн-уоттанан үөрбүтэ-көппүтэ буолуой? Бүгүн олортон биирдэстэрэ мин буоларым олус долгутуулаах. Аны үчүгэйэ, ыаллыы олорор дьоммутун кытта бары бэйэ-бэйэбитин билсэбит.
“Хаарбах дьиэттэн дьону көһөрүү” программанан дьону дьиэлиир үлэҕэ, мин көрүүбүнэн Нам улууһа инники сылдьар. Эрдэ бэйэм маннык дьиэлэниэм дии санаабат этим. Соһуччу дьиэлэммиппититтэн манна үлэлэспиттэргэ бука барыларыгар махтанабыт.
Харысхан Попов