Дойдубут үрдүнэн Дьиэ кэргэн, Саха сиригэр Оҕо саас, Наммыт улууһугар Оҕо спордун сылларынан уонна Космонавтика күнүнэн, Намнааҕы 1 №-дээх орто оскуола физкультура учууталлара уонна Аҕа сэбиэтин председателэ Леонид Федоров көҕүлээһиннэринэн сүүрүү акцията саҕаланна.
1961 сыллаахха, 58 сыл анараа өттүгэр, Юрий Гагарин Аан дойду үрдүнэн бастакынан космоска көтөн тахсыбыта. Онуоха, бу түгэни чиэстээн, сылын ахсын Байконур куоракка ракета көтөн тахсар площадкатыттан эстафетнай сүүрүү акцията биллэриллэр. Бу акцияны өйөөн, И.С. Гаврильев аатынан Намнааҕы 1 № — дээх орто оскуола 17 үөрэнээччитэ, физкультура учууталлара Николай Корнилов, Татьяна Исакова, Вероника Мальцева, Максим Алексеев, Оҕо хамсааһынын иитэр үлэҕэ сүбэһит Матрена Оконешникова, ону кытта Аҕа сэбиэтин председателэ Леонид Федоров Хомустаах Иккис нэһилиэгэр сүүрэн бардылар. 2 Хомустаах нэһилиэгэ Нам кииниттэн 15 км тэйиччи сытар, ол да буоллар оҕолор күүстээх санааларын ыһыктыбакка сүүрүүнү бэрт чэпчэкитик саҕалаатылар.
Марафоннай акция кыттыылаахтарын 10:00 чаастан И.С. Гаврильев аатыынан 1-кы №-дээх оскуола иннигэр үөрүүлээх быһыыга-майгыга атаардылар, технология учуутала Максим Иванов салгыҥҥа көтөн тахсар бэйэ оҥоһуу ракетатын көтүттүлэр.
Сүүрүү бастакы суолун Дьиэ кэргэн сылынан ыытыллыбыт оскуола иһинээҕи «Веселые старты» күрэх кыайыылаахтара Федоровтар дьиэ кэргэн тэлэн бардылар . Кинилэр кэннилэриттэн тилэх баттаһа сүүрүү көрүҥүнэн күүскэ дьарыктанар оҕолор түһүннүлэр.
Лена Корякина