Горнай улууһун Күөрэлээҕэр ахсынньы 1 күнүгэр «Бигэ туруктаах дьиэ кэргэн» улуустааҕы форумҥа Нам улууһуттан Владимир Уодай салайааччылаах бөлөх кыттыыны ылбыта. Форум кыттыылаахтарыгар «Дьылҕан бэйэҥ илиигэр»; «Дьиэ кэргэҥҥэ оҕону иитиигэ өбүгэ үгэстэрэ»; «Дьиэ кэргэн – эбии дохуот»; «Дьиэ кэргэни хамсатар күүс – Аҕа» секциялар үлэлээтилэр. Намнар анаан кэлбит «Дьиэ кэргэни хамсатар күүс – Аҕа» секцияҕа сылдьыбыттар.
«Горнай улууһугар Хамаҕаттаттан Ким Иванов, Үөдэй аҕа түмсүүтүн салайааччыта Иннокентий Иванов нэһилиэк кэрэхсэбиллээх сирдэрин түмэли, балаҕаны көрбүппүт», — диир Владимир Уодай.
Ону тэҥэ, дьон-сэргэ Дария Никифорова «Туой»; Ксения Вензель «Фоторамка — декор»; Елена Жиркова «Саҥа дьыллааҕы макияж» маастар-кылаастардарыгар сырыттылар. Салгыы, «Аҕа, Ийэ уонна мин — спортивнай дьиэ кэргэн» күрэхтэһии буолбут.
Форумҥа суолталааҕы кэпсэппиттэр, спортивнай күрэхтэһиигэ кыттыыны ылбыттар, сынньалаҥҥа «Дьиэ кэргэн – дьол уйата» талааннаах дьиэ кэргэттэр эҕэрдэ кэнсиэрдэрин көрбүттэр.
Харысхан Попов