Аҕа дойду буойуннарын дьиэ кэргэттэрин комитетын СӨ регионнааҕы штабын бэрэстэбиитэллэрэ от ыйын 25 күнүгэр Нам улууһугар үлэлээтилэр. Бу туһунан СӨ Ил Дарханын уонна правительствотын пресс-сулууспата иһитиннэрдэ.
Комитет председателин солбуйааччыта Лена Иванова:
—Нам улууһугар биһиги байыаннай дьайыыга сылдьар байыастар чугас дьоннорун кытары көрүстүбүт. Көрсүһүүгэ 36 киһи сырытта. Байыаннайдар дьиэ кэргэттэрин чилиэннэрэ дьиэҕэ-уокка сыһыаннаах араас чэпчэтиилэр, ОДьКХ эйгэтигэр о.д.а социальнай өйөбүл боппуруостарын ыйыталастылар. Кинилэргэ барыларыгар босхо юридическай көмө оҥоһулунна. Сорох ыйытыылар хонтуруолга ылыллан, ситэриилээх былаас уорганнарыгар бэриллиэхтэрэ уонна туолуор диэри регионнааҕы штаб кэтэбилигэр сылдьыаҕа.
Кини бэлиэтээбитинэн, Нам улууһугар тахсан штаб үлэтин тэрийиигэ улахан көмөнү улуустааҕы кииннэммит библиотека ситимин директора Майя Софронова уонна улуус дьаһалтата көмөлөспүттэр.
Бу иннинэ СӨ Аҕа дойду буойуннарын дьиэ кэргэттэрин комитетын регионнааҕы штаба Горнайга, Тааттаҕа, Кэбээйигэ, Хаҥаласка, Өлүөхүмэҕэ, Алдаҥҥа уонна Нерюнгрига тиийэн байыастар дьиэ кэргэттэрин чилиэннэрин кытары көрсүбүттэр.
Лена Ноговицына