Нам улууһун булчуттарын уонна балыксыттарын уопсастыбата “Бастакы атыыр кус” диэн күрэх тэрийбитэ. Ол курдук, иитиэх кустаахтар нэдиэлэ устата чөркөй уонна көҕөн атыырыгар кустаабыттарын уопсастыба председателэ Иван Яковлев кэпсиир.
Барыта 60 булчут бэйэ кустаах күрэхтэспит. Нам сэлиэнньэтиттэн Антон Попов маҥнайгынан көҕөн уонна чөркөй бултаан кыайыылааҕынан ааттанан туртаска лицензия ылла. Иккис миэстэлээх Нам олохтооҕо Юрий Сивцев “Учур” маҕаһыыҥҥа 10 000 солк. суумалаах сертификатынан наҕараадаланна. Үһүс Никольскайтан аҕам саастаах булчут Иннокентий Герасимов тахсан тимир уустарыттан саха быһаҕын тутта. Аппааныттан эдэр булчут Артем Новгородов “Учур” маҕаһыыҥҥа 6 000 солк. суумалаах сертификатынан наҕараадаланна. Оттон Аппааны кусчута Альберт Уваровскай “Учур” маҕаһыыҥҥа 5 000 солк. суумалаах сертификат ылбыт. Намтан Алексей Платонов духовой манок ылла. Алексей Кондаков уонна Александр Назаров анал бириистэринэн наҕараадаланнылар.
“Күрэххэ быраабыла быһыытынан, көҕөнү уонна чөркөйү бастакы бултаабыт киһи кыайыылааҕынан таҕыста. Арай, көҕөн эрэ эбитэ буоллар күрэхтэһиибит түмүгэ эрдэ тахсыа эбит. Чөркөйү байанайдаах булчуттар бултаатылар диэн бэлиэтиэххэ наада. Ити курдук чөркөйү киллэрэммит күрэхтэһиибит сытыы буолла. Күрэхтэһиини көһө сылдьар кубоктаах сыл аайы ыытыахха диэн быһаарыныыга кэллибит.
Күрэхтэһиибит бириистэригэр өйөөбүт, көмөлөспүт СӨ булт хаһаайыстыбатын Департаменыгар, СӨ Росохотрыболвсоюзка, улуустааҕы олохтоох дьаһалтаҕа, бөрөһүт В.Г. Николиҥҥа, Нам улууһун тимир уустарын түмсүүтүгэр, Теплогаз, Дэлэй маҕаһыыннарга махтанабыт”, – диир Иван Васильевич.
Харысхан Попов