Ахсынньы 3 күнүгэр Нам сэлиэнньэтигэр саастаах дьону чөл олоххо тардар, эти-сиини чэбдигирдиигэ уонна спортка көҕүлүүр сыаллаах кыһыҥҥы спартакиада пенсионердары түмтэ. Түөлбэлэр хамаандалара, 50-тэн үөһэ саастаах дьахталлар, 55-тэн үөһэ саастаах эр дьон, спорт үс көрүҥэр: дартска, корнхоллга уонна “Көрдөөх стартка” күөн көрүстүлэр.
Бары көрүҥнэргэ хатыһыылаах, сытыы киирсиилэр буоллулар. Корнхоллга хамаандалартан 3 дьахтар, 3 эр киһи 6 миэтэрэттэн 400 гр. ыйааһыннаах 8 мөһөөччүгү 3-тэ төхтөрүйэн быраҕыыга илин-кэлин түһүстүлэр. Бу көрүҥҥэ «Нэлэгэр», «Даадар», түөлбэлэр холбоһуктаах хамаандалара 189 оч. хомуйан 1м. ылла. «Базовай», «Север» түөлбэлэрин холбоһуктаах хамаандата 177 оч. 2 м. таҕыста. 3 м. 158 оч. «Строительнай» түөлбэ хамаандата хааччынна.
Дартска сыыппаралаах сектордары табан, очукуо хомуйуутун хас да көрүҥэр 3 дьахтар, 3 эр киһи састааптаах хамаандалар тургутустулар. 5605 оч. хомуйан «Нэлэгэр», «Даадар» түөлбэлэрин хамаандата 1 м. ылла. 4854 оч. ылбыт «Базовай», «Север» түөлбэлэрин хамаандата 2 м., 4693 оч. хомуммут «Строительнай» түөлбэ хамаандата 3 м. ыллылар.
«Көрдөөх стартка» түөлбэлэр 3 дьахтар, 3 эр киһиттэн турар хамаандалара бириэмэҕэ үргүлдьү 6 түһүмэҕинэн (боулинг, хайыһардаах сүүрүү, басткетбол мээчигин корзинаҕа киллэриигэ, анал «корзинаҕа» кыра мээчиги быраҕан киллэриигэ, чууркаҕа тоһоҕону саайыыга) күөн көрүстүлэр. Ыһыылаах-хаһыылаах, хатыһыылаах күрэххэ 1 м. «Нэлэгэр», «Даадар» түөлбэлэрин хамаандата ылла (бириэмэтэ — 10,10,41). 2 м. «Базовай», «Север» түөлбэлэрин хамаандата (10,56,95), 3 м. «Строительнай» түөлбэ хамаандата (11,18,28) ыллылар.
Хас көрүҥ аайы кыайыылаах уонна бириистээх миэстэҕэ тиксибит хамаандалар бэтэрээн спортсменнара мэтээллэринэн, туоһу суруктарынан наҕараадаланнылар.
Уопсай түмүккэ «Нэлэгэр», «Даадар» түөлбэлэрин хамаандата 1 м. ылан, кыһыҥҥы спартакиадаҕа чемпионнаата, кубогынан наҕараадаланна. 2 м. — «Базовай», «Север» түөлбэлэрин хамаандата, 3 м. — «Строительнай» түөлбэ хамаандата ыланнар, эмиэ кубогынан бэлиэтэннилэр.
Дойдубутугар Дьиэ кэргэнэ сыла түмүктэнэрэ чугаһаата. Бу күрэхтэһиигэ түөлбэлэртэн барыта 8 дьиэ кэргэн кыттыбыта кэрэхсэбиллээх. Ол курдук, «Строительнай» түөлбэттэн: Егор, Агаша Протопоповтар, Сергей, Матрена Ивановтар, «Базовай» түөлбэттэн: Николай, Розалия Сидоровтар, «Октябрьскай» түөлбэттэн: Семен, Пелагея Тимофеевтар, «Ипподром» түөлбэттэн: Алексей, Светлана Кутуковтар, «Нэлэгэр», «Даадар» түөлбэлэртэн: Петр, Маргарита Новгородовтар, Данил, Диана Потаповтар, Афанасий, Акулина Софроновтар.
Нам с. бэтэрээннэрин кыһыҥҥы спартакиадатын «Лидер» МАУ тэрийэн, сүрүннээн ыытта. Тэрилтэ салайааччыта, күрэхтэһии кылаабынай судьуйата Иван Яковлев бэтэрээннэргэ махтанна, өссө үрдүк ситиһиилэри баҕарда. Күрэхтэһиигэ «Строительнай» түөлбэ эрэ бэйэтин иһиттэн хамаанда туруоран кыттыбытын тоһоҕолоон бэлиэтээтэ. Бу күрэхтэһии эһиилгэттэн календарнай былааҥҥа киирэрин, онно көхтөөхтүк кытталларыгар уонна түөлбэлэр хамаандалара бэйэлэрин кэккэлэрин хаҥаталларыгар баҕа санаатын тиэртэ. Түөлбэлэр салайааччылара маассаабай спорду өйөөн, инникитин хамаандаларын бэйэлэрин истэриттэн туруоруохтара диэн эрэнэбит.
Касьян Олесов-Олук