“Ленскэй нэһилиэк күнэ” тэрээһиҥҥэ күн-дьыл туруга төһө да курус буоллар, дьон-сэргэ күһүҥҥү атыы-эргиэн дьаарбаҥкаҕа, байыаннай дьайыыга сылдьар байыастарбытыгар “Санаа күүһэ” маскировачнай сетка өрүүтүгэр, “Үтүө санаа курууската”, “Помоги собраться в школу” акцияларга кыттыыны ылбыта.
Намнааҕы П.П. Ядрихинскай-Бэдьээлэ аатынан Олоҥхо дьиэтэ тэрийбит, үгэскэ кубулуйбут “Үтүө санаа курууската” акцияҕа байыаннай дьайыыга кыттыыны ылааччылар чугас дьоно, оҕолор отон куттулар. Ону тэҥэ, хас сылын ахсын үтүө акцияҕа Граф Биэрэгин олохтооҕо отонноох кэлэр эбит. Оттон “Санаа күүһэ” маскировачнай сетка өрүүтүгэр, күн-дьыл туругун аахсыбатах Нам улууһа киэн туттар аҕам саастааҕа, бары тэрээһиннэргэ көхтөөхтүк кыттар Егор Петров кэлэн бэйэтин санаатын холбообута. Ытык кырдьаҕастарбыт маннык тэрээһиннэргэ үтүөтүк санаан кыттыыны ылаллара санааҕа да астык, киһи холобур оҥостор бастыҥнара диибит.
Күһүҥҥү дьаарбаҥкаҕа нэһилиэнньэ көрүүтүгэр Нам сэлиэнньэтин түөлбэлэрэ турунан, оҥостон кэлбиттэр. Буоларын курдук, айылҕа сайыҥҥы, күһүҥҥү бэлэхтэриттэн кырасыабай көстүүлээх мааны остуоллары дьон иннигэр тардан кэбиспиттэр. Маны тэҥэ, М.К. Аммосов болуоссатыгар кэлбиттэр Хамаҕатта тигээйилэрин көрбүттэрэ, Хатырык мүөттэрин атыыласпыттара.
Таптаатахпыт аайы быраастарга тиийбэппит диэбиккэ диэри, ол күн нэһилиэнньэ Намнааҕы киин балыыһа фелдьшерэ Елена Заровняева, медсестра Ольга Емельянова өҥөлөрүн туһаммыта.
“Нам сэлиэнньэтэ төрүттэммитэ 82 сылыгар Намнааҕы киин балыыһа үлэһиттэрэ сүүрбэччэ киһини көрбүппүт. Доруобуйаларын көрдөрөөччүлэр “хата манна киирэн грипполбутун да ыллыбыт, анализ да туттардыбыт”, “намнар маннык медицина өҥөтүн оҥорор массыыналаахпыт үчүгэйин” диэн үөрбүттэрин, астыммыттарын биллэрбиттэрэ”, – диир фельдшер Елена Заровняева.
Нам сэлиэнньэтэ төрүттэммитэ 82 сылыгар нэһилиэккэ үгүһү оҥорбуттар бэлиэтэммиттэрэ, наҕаарадаламмыттара. Ленскэй нэһилиэк күнүн чиэһигэр, баһылык Петр Сокольников илиититтэн “Гражданская доблесть” түөскэ иилиллэр үрдүкү бэлиэнэн нэһилиэк ветераннарын сэбиэтин председателэ Попова Вера Васильевна наҕаарадаланна; уопсастыбаннай олоххо көхтөөх кыттыытын, кылаатын иһин диэн ис хоһоонноох бочуотунай грамоталарынан Серкин Валерий Глебович бэлиэтэннэ уонна Васильев Афанасий Ильич бочуотунай грамотаны тэҥэ Ленскэй нэһилиэк өйдөбүнньүк чаһытынан наҕараадаланна. Уһун сылларга үгүһү оҥорор нэһилиэк бастыҥнарын үөрүүлэрин тэҥҥэ үллэстэбит.
Сервиснай этэрээккэ бэйэлэрин көрдөрбүт волонтердар оҕолорбут Ленскэй нэһилиэк баһылыгыттан махтал суруктарынан наҕараадаланнылар: Лыткина Нария, Протодьяконов Виталий, Яковлев Павел, Гоголева Виктория, Татаринов Михаил, Винокурова Уйгулаана, Потапова Валерия, Новикова Рада, Сокольников Айтал, Сивцева Намыйа, Попова Лилия, Сысолятин Иван, Лукина Анастасия, Дьячковский Сергей.
М.К. Аммосов набережнайыгар олох туһунан эйгэ этэ. Манна ырыа-тойук, оонньуу, көр-нар, спортивнай тэрээһиннэр, сэлиэнньэбит самодеятельнай артыыстар бэйэлэрин нүөмэрдэрин бэлэх ууммуттара. Тэрээһиҥҥэ кэлбит ыалдьыттар, хас биирдии Ленскэй нэһилиэк олохтооҕо итии буотарах миинэ иһэн астыммыттарын, дуоһуйбуттарын биллэрбиттэрэ.
Үөрүүлээх күҥҥэ түргэнник арбуз сиэһиҥҥэ дьон күлүүтэ, хорнхолд оонньууга араастаан туттуу көрөөччү өйүгэр-санаатыгар үтүөнү эрэ санатан, умнуллубат, төннүбэт хартыына буолан хаалыаҕа.
Ленскэй нэһилиэк олохтоох дьаһалтата уонна Н.М. Рыкунов аатынан модельнай библиотека ыыппыт «Любимое село в объективе» хаартысканан-быыстапка күрэҕэр 15 кыттааччыттан барыта 72 үлэ киирдэ: Нам кырасыабай миэстэлэрин кэпсиир хаартыскалар «Милые сердцу места»; Нам олохтоохторо үөрүү түгэниттэн хаартыскалара «Подари улыбку селу»; урукку сыллары кэпсиир хаартыскалар «Мгновение истории»; араас тэрээһиннэртэн ылыллыбыт хаартыскалар «Яркие события, праздники».
Намнааҕы Оҕо искусствотын оскуолатыттан Яна Христофорова, Намнааҕы МЦБС Анастасия Никонова, НДПИПИ Анастасия Заболоцкая састааптаах дьүүллүүр сүбэ быһаарыытынан «Милые сердцу места» номинацияны Светлана Кутуковаҕа, «Подари улыбку селу» – Андрей Замятиҥҥа, «Мгновение истории» – Светлана Емельяноваҕа уонна «Яркие события, праздники» – Валерий Поповка туттарда.
Бэлиэтээн эттэххэ, хаартысканан-быыстапка күрэҕэр 7 саастаах Пономарева Аврора, Намнааҕы алын кылаас оскуолатын үөрэнээччилэрэ Николаев Ярослав (4 б кылаас), Жолдошев Даниар, Дарсен (2 а кыл.) уонна Охлопков Дьулустан (2 а кыл.) кыттыыны ыллылар.
Ленскэй нэһилиэк олохтоох дьаһалтата уонна Намнааҕы оҕо модельнай библиотека тэрийэн ыыппыт «Мир и добро глазами детей» уруһуй күрэҕэр 28 кыттааччы Намы хайдах көрөрүн асфальтка уруһуйдаата. Намнааҕы Оҕо искусствотын оскуолатыттан Ксения Колодезникова, Намнааҕы оҕо библиотекатыттан Феврония Миронова уонна Мария Эверстова састааптаах дьүүлүүр сүбэ бириистээх миэстэлэри быһаарда. 7-гэр диэри 7 саастаах Аргунова Адель кыайыылааҕынан, иккис 6 саастаах Карамзина Амаана Уонна үһүс 5-тээх Сенников Кеша үһүс. 10-гар диэри Исакова Злата (10 саастаах) бастакы, иккис – Павлова Мичийэ (10 саас), үһүс – Павлов Арчын (8 саас).
Петр Сокольников, Ленскэй нэһилиэк баһылыга:
Бар дьоммун сэлиэнньэбит төрүттэммитэ 82 сылынан эҕэрдэлиибин! Ленскэй нэһилиэк күн ахсын дьоно-сэргэтэ элбиир, үгүс тутуу ыытыллар, бары хайысхаҕа кыралыын-улаханныын үүнэбит-сайдабыт. Күөх сайыммыт курдук бэйэ-бэйэҕэ сылаас, сымнаҕас сыһыаны олохтуохха.
Таһырдьа сибиэһэй салгыҥҥа ыытыллар тэрээһиннэр бары бэйэлэрэ туһунан туспа иэйиилээхтэр, уратылаахтар диэн бэлиэтиэм этэ. Сахабыт сиригэр көмүс күһүммүт эргиллэн, тутуспутунан кыһыҥҥы кэмҥэ киириэхпит. Хайдах да күннэр турдуннар, хайдах да кэмнэр үүннүннэр, бу курдук биир сомоҕо түмсэн, биир истиэнэ буолуохха!
Харысхан Попов