Нам сэлиэнньэтигэр оскуола үөрэнээччилэрэ ырааһырдыы үлэтин саҕалаатылар. Бастакы сезоҥҥа 50 волонтер оҕо сэлиэнньэҕэ кыһын устата мунньуллубут бөҕү уонна күн устата тахсар бөҕү-сыыһы хомуйуоҕа.
Намнааҕы 1-кы №-дээх оскуолаттан 25, Намнааҕы 2-с №-дээх оскуолаттан 25 үөрэнээччи улуус киинэ ыраас турарыгар күүстэрин ууруохтара, сайыҥҥы сынньалаҥнарыгар дьарыктаах буолуохтара. Ол курдук, Намнааҕы 2-с №-дээх оскуолаттан Дьулустаан Новиков салайааччылаах саҥа тэриллибит волонтерскай этэрээт уонна Ия Петрова салалталаах кыһыл таҥастаах “Эрэл” волонтерскай этэрээт киин уулуссалары, сквердэри, болуоссаттары ыраастыахтара.
Ый устата үлэлээбит оҕолору Ленскэй нэһилиэк олохтоох дьаһалтата хамнастыаҕа уонна саастарын ситэ илик оҕо дьарыктаах буолуутун программатынан дьарыктаах буолуу киинтэн харчы аахсыахтара.
“Оскуола иһинэн үлэлиир волонтер этэрээттэрэ аһылыктаахтар. Ону тэҥэ, тэрээһиннэрдээхтэр”, – диир олохтоох дьаһалта специалиһа Анна Слепцова.
Харысхан Попов