Дойду үрдүнэн дьиэ кэргэн, таптал, бэриниилээх буолуу күнүн көрсө 50, 55 уонна 60 сыл бииргэ олорбут үбүлүөйдээх Ленскэй нэһилиэк 8 дьиэ кэргэнэ “Таптал уонна бэриниилээх буолуу” Россиятааҕы наҕараадалары туппута.
Бэлиэ күн Нам сэлиэнньэтин ыаллара Аркадий Николаевич, Матрена Афанасьевна Пестряковтар сатаан кэлбэтэхтэрэ. Нам улууһун баһылыгын солбуйааччы Юрий Дьяконов, Ленскэй нэһилиэк баһылыга Петр Сокольников от ыйын 16 күнүгэр Пестряковтар дьиэлэригэр тиийэн баҕа санааларын эттилэр, эҕэрдэлээтилэр. Ытык кырдьаҕастарбытын кытта ирэ-хоро кэпсэттилэр.
Санаттахха, үрдүк наҕараадалары Намнааҕы ЗАГС дьиэтигэр Нам улууһун баһылыга Юрий Слепцов үөрүүлээх быһыыга-майгыга Дмитрий Михайлович, Екатерина Ильинична Елисеевтарга; Иннокентий Иннокентьевич, Мария Дмитриевна Ивановтарга; Валерий Васильевич, Августа Иннокентьевна Павловтарга; Василий Николаевич, Мария Васильевна Поповтарга туттартаабыта.
Салалта 50 сыл бииргэ олорон үбүлүөйдээх кыһыл көмүс сыбаайбаларынан Анатолий Романович, Зоя Романовна Платоновтары бэс ыйын 26 күнүгэр эҕэрдэлээбитэ.
Ону тэҥэ, Анатолий Уварович, Зинаида Ивановна Николаевтар; Иван Андреевич, Евдокия Прокопьевна Ивановтар; Денис Михайлович, Вера Михайловна Федоровтар Дьокуускай Комсомольскай болуоссатыгар ыытыллыбыт тэрээһиҥҥэ наҕараадалары туппуттара.
Ленскэй нэһилиэк пресс-киинэ