Нам сэлиэнньэтигэр олунньу бастакы бээтинсэтэ оһуохай күнүнэн биллэр.
Василий Винокуров дириэктэрдээх Ньургун Тимофеев аатынан өрөспүүбүлүкэтээҕи олимпийскай эрэл спорт оскуола коллектива, иитиллээччилэрэ оһуохай күнүгэр кыттыһаллар. Күн устата олимпийскай эрэл үлэһиттэрэ сахалыы таҥастаах үлэлиэхтэрэ.
«Наммыт сэлиэнньэтигэр оһуохай күнэ тэриллибитэ үчүгэй. Ленскэй нэһилиэк баһылыга Петр Сокольников оруннаахтык толкуйдаабытын элбэх киһи өйүүр. Бүгүн үгүс оскуола, тэрилтэ оһуохайга кыттыспыт, тэрээһин оҥорбут буолуохтаах.
Саас кэлэн туох барыта уһуктар кэмигэр, күн тахсыыта биһиги оскуола оһуохайдаан күүс-уох ыллыбыт, алгыс тылларын иҥэриннибит.
Ол курдук, Владимир Осипов таһаарбыт алгыс тылларын эппитигэр-хааммытыгар иҥэриннибит. Айылҕа уһуктуута, тыллыыта этиллибит, анаммыт тыллар иччилэнниннэр. Оҕолорбутун күрэхтэһиилэргэ ситиһии арыаллаатын, үрдүккэ, сырдыкка сирдээтин», — диир дириэктэрэ Василий Васильевич.
Харысхан Попов