Ааспыт нэдиэлэҕэ Партизан орто оскуолатыгар бастакы улуустааҕы кылаас салайааччыларын куонкуруһа буолан ааста. Куонкурус дойдуга биллэриллибит Педагог уонна Уһуйааччы сылыгар ананна.
Уһуйааччыларыгар ыйдаран, сүбэлэттэрэн, 14 эдэркээн кылаас салайааччылара маастарыстыбаларын түөрт түһүмэххэ көрдөрдүлэр: кылаас чаас ыыттылар, бэйэлэрин билиһиннэрдилэр, араас түгэннэргэ эппиэттээтилэр, маҥнайгы былааннарын көмүскээтилэр.
Аныгы кэм кылаас салайааччыта хайдах буолуохтаах эбитий? Кини оҕолору кытта биир истиҥ тыл булар, интэриэстэрин көмүскүүр, тупсаҕай, эргиччи кэрэ эйгэни олохтуур эрэ буолбакка, өр сыл үлэлээбит уһуйааччытын уопутугар тирэнэрин, кылаас салайааччыта учуутал эйгэтин иһигэр баар ыарахан, сылаалаах, ол эрээри ис сүрэхтэн тахсар олус интэриэһинэй бэйэтэ туспа идэ буоларын бу куонкурус көрдөрдө.
А.С. Евстафьева, РФ үөрэҕириитин Бочуоттаах үлэһитэ, СӨ үөрэҕириитин туйгуна, Хохоловтар династияларын чилиэнэ; А.И. Ядрихинская, РФ иитиигэ Бочуоттаах үлэһитэ, СӨ үөрэҕириитин уонна ыччат политикатын туйгуна, Нам улууһугар «Бастакылар» хамсааһыннарын олохтоох отделениетын тэрийэр специалиһа; Е.С. Алексеева, Нам улууһун гимназиятын дириэктэрин сүбэһитэ; Т.Н. Павлова, үөрэх улуустааҕы управлениетын методическай отделын кылаабынай специалиһа, дьүүллүүр сүбэ бэрэссэдээтэлэ; О.А. Осипова, Нам начальнай оскуолатын педагог-логопеда дьүүллүүр сүбэҕэ киирэн бастыҥнары быһаарар эппиэтинэстээх үлэни көрүстүлэр.
Икки күннээх толору ис хоһоонноох куонкурус түмүгүнэн бастакы бөлөххө И.Е. Винокуров аатынан Хатыҥ Арыы орто оскуолатын кылаас салайааччылара П.Д. Павлова, А.Г. Попова, Д.Ф. Алексеев аатынан I Хомустаах орто оскуолатын учууталлара Т. Д. Ермолаева, Т. А. Жиркова, З.П. Саввин аатынан Үөдэй орто оскуолатын учууталлара В.А. Данилова, Е.С. Данилова, иккис бөлөххө Е.С. Сивцев-Таллан Бүрэ аатынан Бөтүҥ орто оскуолатын учууталлара Т. П. Винокуров, М.В. Румянцев, Е.М. Ларионов аатынан Салбаҥ орто оскуолатын учууталлара Т.В. Касьянова, Д.Г. Местников,
И.Е. Москвитин аатынан Искра сүрүн оскуолатын учууталлара Е.В. Иванова, С.В. Павлова бастыҥнарынан ааттаннылар. Маны таһынан анал номинациялар туттарылыннылар.
Куонкуруһу көҕүлээн тэрийбит, ыыппыт Бөтүҥ орто оскуолата буолар. Кинилэр сүрдээҕин бэлэмнэммиттэр, ол курдук, кылаас чаастара, бэйэни билиһиннэриилэрэ, былааннара биир ситимнээх. Маннык профессиональнай куонкурустар буолаллара улууспут үөрэҕин системата сайдыытын көрдөрөр.
Татьяна Касьянова, Салбаҥ