Бүгүн сарсыарда 10 чаас туругунан Үөдэйгэ уу таһыма -2 см түһэн саҕалаата. 2-с Хомустаахха – -4 см түстэ. Партизаҥҥа – -2 см. Никольскайга – -2 см. Хамаҕаттаҕа – -2 см. Ленскэй нэһилиэккэ – -2 см. Хатыҥ Арыыга – -12 см. Граф Биэрэгэр – -3 см. Хатырыкка уларыйыы суох. Арбыҥҥа +3 см эбилиннэ. Маймаҕаҕа – -55 см. Көбөкөҥҥө – -26 см. Фрунзеҕа уларыйыы суох.
Дмитрий Садовников Арбын уонна Түбэ икки ардыгар турбут хойуу мууһу дэлби тэптэрии түмүгэр муус устан саҕалаабытын бэлиэтээбитэ. Билиҥҥитэ улууска 14 нэһилиэнньэлээх пуун уу анныгар турар. Ол курдук, дэлби тэптэрии кэнниттэн уу таһыма аргыый түһэн саҕалаабытын уонна эмсэҕэлээччилэргэ бары күүс уурулларын Дмитрий Садовников этэр.
Бүгүҥҥүттэн Нам улууһугар уу таһыма түһэн саҕаламмыта билиннэ. СӨ Ил Дархана Айсен Николаев Нам улууһугар билиҥҥи турук, халаан уутун туһунан чаас аайы иһитиннэрии ыларын чопчулуур. Ил Дархан Айсен Николаев Нам улууһугар алдьаныыны-кээһиниини чөлүгэр түһэриигэ күүстээх болҕомтотун ууруоҕа. Эмсэҕэлээччилэргэ туох баар көмө оҥоһуллар соругун туруорда. Ону тэҥэ, суоллар, социальнай суолталаах объектар чөллөрүгэр түһэриигэ үлэлэр ыытыллыахтара.
Дьокуускай баһылыга Евгений Григорьев Нам улууһугар материальнай көмөтүн биллэрдэ. Ол курдук, 1000 араас порциялаах аһылык кэлиэҕэ.
Россия ыксаллаах быһыыга министиэристибэтин Саха сиринээҕи ГУ пресс-киинэ иһитиннэрэринэн, Нам улууһугар халаан уутуттан көмүскэниигэ быыһыыр сулууспа 74 сотруднига үлэлиир, 11 араас техника, 5 уунан устар тэрил туһаныллар.
Быыһыыр сулууспа сотрудниктара ыксаллаах быһыыга Аппааны, Граф Биэрэгэ, Кыһыл Дэриэбинэ, Бөтүҥ, Модут, Хатырык нэһилиэктэригэр көмөлөһөн, күүс-көмө буолаллар.
— Нам улууһугар бэҕэһээ сарсыарда 26 буолан кэлбиппит. Күнү быһа Граф Биэрэгэр улахан дамбаны бөҕөргөтүүгэ, бөһүөлэк иһигэр Советскай уулуссаҕа дамбаны кутууга үлэлээбиппит. Уу улахан дамбаны тоҕо көппүтүн кэннэ, олохтоохторго иһэр ууну, бородууктаны тиэрдиигэ аадырыстаах көмөнү уонна бу сарсыарда 4 чааска диэри дьону эвакуациялыырга үлэлэстибит. Түүн устата 8 киһини, ол иһигэр 3 сокуоннай саастарын туола илик оҕолору, тастыбыт. Билигин куораттан эбии 30-ча сотрудник, техника, устар тэрил кэлэрин кэтэһэбит, — диир Россия ЫБМ Саха сиринээҕи ГУ Дьокуускайдааҕы 1 N-дээх ПСП начальнига Ярослав Малюшин.
«Эҥсиэли» хаһыат