Россия балыксыттарын күнүгэр Улуу сэрии кыттыылааҕа, ветерана Василий Яковлев бирииһигэр Партизан “Хара Былыт” Эбэтигэр күөгүнэн балыктааһыҥҥа күрэхтэһии буолан ааспыт.
“Аҕа дойдуну көмүскэспит сэрии ветерана, аҕам Яковлев Василий Андреевич бирииһигэр оҕолорго күөгүнэн балыктааһын Нам улууһугар Оҕо спордун сылын чэрчитинэн ыытылынна. Күрэхтэһиигэ оҕолор үс бөлөҕүнэн күрэхтэспиттэрэ”, – диир улуус булчуттарын уонна балыксыттарын сэбиэтин председателэ Иван Яковлев.
Бочуоттаах бэлиэ орденын кавалера Яковлев Василий Андреевич бирииһигэр ыытыллыбыт күрэхтэһиигэ от ыйын 10 күнүгэр оҕолор кыттыыны ылбыттар. Күрэхтэһии тэрийээччитэ Иван Васильевич иһитиннэрбитинэн, күрэхтэһиигэ Дьокуускай, Белгород куораттартан, Уус Алдантан, Нам улууһун нэһилиэктэриттэн 30 оҕо кыттыыны ылбыт.
Кыайыылаахтар бары мэтээлинэн, сыаналаах бириистэринэн наҕараадаламмыттар. Ону тэҥэ, балыксыт оҕолор анал ааттары, спонсордартан бириистэри туппуттар. Күөгүнэн күрэхтэһиигэ “Саамай улахан балык” анал аат хаһаайынынан Партизантан Кривошапкин Арчын ааттанан Александр Парников туруорбут бирииһинэн наҕараадаламмыт. Оттон “Саамай эдэр балыксыт” анал ааты Бөтүҥтэн кэлбит 4 саастаах Дайаана Бочкарева ылан Анатолий Копырин олохтообут 5000 суумалаах сертификатынан бэлиэтэммит.
Ол курдук, 9 саастарыгар дылы оҕолорго 1-кы миэстэни Черноградскай Миша, 2-с миэстэни Партизантан Яковлев Артем, 3-с миэстэни Дьокуускайтан Рудых Соня ылбыттар.
10-13 саастаахтарга 1-кы миэстэҕэ Намтан Дьячковский Дархан тахсыбыт. 2-с Уус Алдантан Гуляева Мирослава буолбута уонна 3-с миэстэни Партизан уола Аммосов Эрхаан ылбыт.
14-17 саастаахтарга кыайыылааҕынан Нам балыксыт оҕото Охлопков Айтал ааттаммыт. 2-с нүөмэрдээх балыксытынан Партизантан Кривошапкин Эрчим буолбут. 3-с бочуоттаах миэстэҕэ Партизан уола Кривошапкин Арчын тиксибит.
Күрэх үрдүк таһымҥа ыытыллыбытыгар, тэрийээччилэр күүс-көмө буолбут бар дьонноругар махтал тылларын тиэрдэллэр: Кривошапкин Степан Ивановичка, Александр Ивановичка, Прасковья Андреевнаҕа, Зоя Андреевнаҕа, Анастасия Слепцоваҕа, Петр Протопоповка, Светлана, Валерий Замаратскийдарга, Анатолий Копыриҥҥа, Александр Парниковка, Партизан олохтоох дьаһалтатыгар доруобуйаны, дьолу-соргуну, ситиһиилэри баҕараллар.
