Нам улууһугар Профессиональнай үөрэх устудьуоннара Саха сиригэр “Студент года-2023” анал аат сүүмэрдиир түһүмэҕэр кыттан саҕалаатылар. Илья Винокуров аат. Намнааҕы педагогическай колледжка икки күн устата 112 устудьуон бэйэтин билиитин көрдөрүөҕэ.
“Бүгүҥҥү сүүмэрдиир күрэхтэһии кыайыылаахтара “Студент года-2023” Россия национальнай бириэмийэтин иһин кыттыыны ыла айанныахтара», – диир Намнааҕы колледж директора Елена Никитина.
Профессиональнай үөрэх устудьуоннарыгар сылын ахсын ыытыллар “Студент года” тэрээһин ыытыллыбыта быйыл номнуо 10 сыла буолбут. Таһымнаах күрэхтэһиини Саха сиринээҕи үөрэх уонна наука министерствота, Профессиональнай үөрэхтээһин сайдыытын института уонна “Россия ыччатын Союһа” тэрийбиттэрин директор Елена Вячеславовна бэлиэтиир.
Нам улууһугар «Профессионал года»; «Председатель совета обучающихся года»; «Староста года»; «Общественник года»; «Творческая личность года»; «Спортсмен года»; «Добровольческое объединение года»; «Студенческое медиа года»; «Патриотическое объединение года» уонна «Студенческий клуб года театральный клуб года/студенческий совет» анал ааттар биллиэхтэрэ. Күрэхтэһии устата кыттааччылар үлэлэрин 30 эксперт сыаналыырын Намнааҕы колледж социальнай педагога Дария Полускина иһитиннэрэр.
“Студент года-2023” федеральнай бырайыак, биллэн туран, Профессиональнай үөрэх кыһаларыттан билии ылар устудьуоннары бары эйгэҕэ сайыннарарга туһуланар”, – диир Дария Владимировна.
Харысхан Попов