Сочи куоракка кулун тутар 1-7 күннэригэр Аан дойдутааҕы ыччат фестивала салҕанар. Сочига ыччат фестивалыгар 189 дойду уонна Россия регионнара кыттыыны ыла сылдьалларын Нам улууһун дьиэ кэргэн уонна ыччат политикатын отделын салайааччыта Екатерина Евстафьева этэр.
Саха сирин делегациятыгар холбоһон, Нам улууһуттан Екатерина Евстафьева, ХИФУ устудьуона Рената Тимофеева, Антон Васильев кыттыһаллар. Холобура, остуол оонньуутугар спорт маастара, биир дойдулаахпыт Рената Тимофеева фестивалга төрүт остуол оонньууларын сүрүн быраабылатын сырдатар, тарҕатар. Бэлиэтээн эттэххэ, хабылык, хаамыска оонньуутугар Зимбабве дойдутун олохтооҕо Няша Муранда интэриэһэргээн ылсыбытын сырдаппыппыт.
Аан дойдутааҕы ыччат фестивалыгар үгүс кыттааччы араас хайысхаҕа сырдатыы оҥорбутуттан, Екатерина Сергеевна политическай блогер Стас Айтакпросто байыаннай дьайыы туһунан иһитиннэриитин сэргээбит.
“Президент Владимир Путин ыйааҕынан буола турар фестивалга хас биирдии кыттааччы бэйэтин төрүт култууратын билиһиннэрэр. Таһымнаах тэрээһиҥҥэ СӨ Правительствотын председателин солбуйааччы Ольга Балабкина сырытта, тыл эппитэ”, – диир Екатерина Евстафьева.
Харысхан Попов