Дойдубут Президенэ Владимир Путин үгэскэ кубулуйбут пресс-конференцията нэһилиэнньэ, дьон-сэргэ болҕомтотун өрүү тардар. Нам улууһун депутаттарын сэбиэтин председателэ Алексей Винокуров бу тула санаатын үллэстэр:
— Бастатан туран, пресс-конференция саҕаланыан иннинэ «Дойду Президенинэн ким буолуой?», «Кулун тутарга буолар быыбарга ким кыттыай?», «Дойдуну ким салайар буолуой?» диэн ыйытыылар элбэх киһини долгуппута. Владимир Владимирович Путин туруорунарын истэн тус бэйэм олус үөрбүтүм. Бу соторутааҕыта кини Арабскай Эмиракка тиийэ сылдьыытыгар, үрдүк таһымнаах көрсүһүүгэ биһиги дойдубут Президенин хайдах курдук убаастыылларын, өйүүллэрин уонна чахчы кыахтаах лидер быһыытынан ылыналларын көрбүппүт-истибиппит. Итиннэ сыһыаран эттэххэ, бэҕэһээҥҥи пресс-конференцияҕа дойдубут ис, тас политикатыгар сыһыаннаах ыйытыыларга хардаран, Россияны өйүүр уонна убаастыыр государстволар элбэхтэрин аҕынна, кими да өстөөх оҥостубаппытын, ханнык да норуоттан, государствоттан аккаастаммаппытын, илиилэрин утары уунан кэлээччилэри кытта хаһан баҕарар бииргэ үлэлэһэргэ бэлэммитин иһитиннэрбитэ.
Үгүс киһини долгутар «СВО-ҕа мобилизация иккис долгуна буолуо дуо?» диэн бэриллибит ыйытыыга Владимир Владимирович мобилизация көрүллүбэтин иһитиннэрдэ. Тоҕо диэтэр, баҕа өттүнэн барааччылар 2 тыһ. км. усталаах фронт дьураатын бигэтик туталларын, байыастарбыт бэрт түргэнник байыаннай дьайыыга үөрэнэн, сабырыйар балаһыанньаны ылан, кимэн киириилэрэ саҕаланан эрэрин иһитиннэрдэ.
Үлэлиир федеральнай программалар тула ыйытыылары биэрдилэр. Кини хаарбах дьиэттэн дьону көһөрүү, элбэх киһини долгутар доруобуйа харыстабылын маҥнайгы сүһүөҕэр сыһыаннаах о.д.а. программалар салгыы үлэлииллэрин, «Земскэй доктор», «Земскэй фельдшер»программаларга субсидиятын үбэ үрдүүрүн иһитиннэрдэ. Улууспутугар маннык үлэ күүскэ барар, онон инники сылларга барыта ситэригэр-хоторугар эрэл баар.
Спорду сайыннарыыга ыйытыылар бэрилиннилэр. Владимир Владимирович спортсмен буоларын ахтан туран, спорду өйүүрүн уонна оҕо спордун күүскэ сайыаннарыахха диэбитин киһи барыта астына истибит буолуохтаах. Ити долгуна биһиэхэ биллиэ диэн эрэнэ саныыбын, тоҕо диэтэр эһиил Дьокуускайбытыгар «Азия оҕолоро» VIII Аан дойдутааҕы спортивнай оонньуу ыытыллар, оттон бу оонньууну Президеммит Владимир Владимирович бэйэтэ өйүүрүн билэбит.
Кырдьык, бэҕэһээҥҥи аһаҕас кэпсэтиигэ саалаҕа баар СМИ үлэһиттэриттэн уонна араас регионнартан дьонтон элбэх ыйытыы киирдэ, онно хоруй бэрилиннэ. Онтон хаалбыт ыйытыыларга болҕомто ууруллан, үлэлэһии барыаҕын санатта. Уопсайынан, 4 чаастан ордук кэмҥэ туһалаах аһаҕас кэпсэтии буолла.
Касьян Олесов