Россия Президенин быыбара 3 күн устата олус тэрээһиннээхтик ыытылынна. Биһиги, Нам улууһун дьоно, президент В.В. Путин ыытар политикатын, национальнай бырайыактарын, тыа сиригэр дьон бигэ туруктаах буоларын туһугар үлэтин үрдүктүк сыаналаатыбыт.
Тэҥнээн көрөр эбит буоллахха, 2018 сылга Владимир Путиҥҥа намнар 58,32% куоластаабыппыт, онтон быйыл, 2024 сылга, 89,36% куолаһы биэрдибит. Бу 31,04% үрдүк. Нэһилиэктэртэн Модут — 96,87%, Искра — 96,51%, Маймаҕа — 95,89%, Көбөкөн – 94, 94, Түбэ – 94,87, Никольскай – 93,88, Таастаах – 93,33, Фрунзе – 92,45, Хатырык – 92,01, Салбаҥ – 91,50, Партизан – 91,47, Арбын – 90,38 % куоластаабыттара да элбэҕи этэр. Алта сыл иһигэр улууспут харахха быраҕыллар гына биллэрдик сайынна. Онон Нам улууһун дьоно күүстээх дойдуга, күүстээх салайааччыны талан сөптөөх хардыыны оҥордубут.
Анатолий Дьяконов, Е.М. Шапошников аатынан Хамаҕатта орто оскуолатын дириэктэрэ:
— Президент В.В. Путин ыытар политиката, национальнай бырайыактара, биһиэхэ, тыа сиригэр, дьон бигэ туруктаах буоларын туһугар үлэтэ элбэҕи этэр. Аҕыйах сыл иһигэр нэһилиэкпит биллэ сайынна, саҥа оскуола, детсад, таас дьиэлэр баар буоллулар.
Матрена Максимова, СӨ бэтэрээнэ, СӨ бочуоттаах кырдьаҕаһа, 2 Хомустаах бочуоттаах олохтооҕо:
— Саха сирэ сайдар: улуустарга, нэһилиэктэргэ сүҥкэн тутуулар бардылар, суол-иис оҥоһуллар, тупсарыллар. Президеммит дойдуга куттал суох буолуутун туруулаһар.
Петр Сокольников, «Ленскэй нэһилиэк» МТ баһылыга:
— Владимир Путин сөптөөх быһаарыныылары ылына, олоххо киллэрэ олорор диэн Нам улууһугар өйүүр дьон
үгүс. Бүтүн нэһилиэнньэҕэ үлэлэтэр национальнай бырайыактара бары хайысхаҕа үтүөнү эрэ аҕалар. Ону тэҥэ, биирдиилээн дьиэ кэргэттэргэ социальнай чэпчэтиилэр, көмөлөр оҥоһуллаллар. Ааҕан бардахха, холобурдар элбэхтэр.
Розалия Лукина, СӨ муниципальнай сулууспатын туйгуна, СӨ норуотун хаһаайыстыбатын үтүөлээх үлэһитэ, Нам улууһун, Түбэ нэһилиэгин Ытык киһитэ:
— Дойдубут социальнай-экономическай сайдыыта күүскэ барар диэн сыаналыыбын. Нэһилиэнньэ бары араҥатын көмүскэллээх буолуутугар ылыллыбыт дьаһаллар олоххо киирэн, сайдыыга төһүү күүс буолаллар. Бүгүҥҥү күҥҥэ ким олоххо тардыһыылаах, сүрэхтээх бэйэтин үлэтинэн-хамнаһынан олоҕун дуоспуруннаахтык олороругар дьоһун олук оҥоһуллар. Быыбарга бары биир киһи курдук кыттан, сөптөөх кандидатураны таллыбыт!.
Катерина Догордурова, Арбын орто оскуолатын директора:
— «Президент В.В. Путины үлэни табыгастаахтык, кэскиллээхтик, хайа да өттүттэн сөптөөхтүк ыытар салайааччы быһыытынан сыаналыыбын. Нэһилиэнньэ бары араҥаларын таарыйар боппуруостарга чопчу
былааннаахтык үлэлиир, бука барыбытыгар кыһаллар киһибит.
Саргылана Пономарева, «Чороон» НАК дириэктэрэ:
— В. Путин сөптөөх дьаһаллары ылынар киэҥ көҕүстээх салайааччы буоларын өссө төгүл бигэргэттибит. Араас салааларга, ол иһигэр, дьиэ кэргэн бигэ туруктаах буолуутугар, үгэс буолбут сыаннастарын харыстыырга уонна бөҕөргөтөргө, үлэнэн хааччыйыыга таһымнаах үлэни тэрийэр. Саҥа төрөөбүт оҕоттон саҕалаан биэнсийэлээхтэргэ, байыаннай дьайыы кыттыылаахтарыгар улахан болҕомто уурулларын сэргиибин. Бу курдук, РФ үрдүкү салалтата, президеммит Владимир Путин бары салаалары сайыннарар национальнай барылы олоххо киллэриэҕиттэн үүнүүгэ-сайдыыга тирэхтэнэбит.
Лена Ноговицына