Кулун тутар 6 күнүгэр Саха Өрөспүүбүлүкэтин Бырабыыталыстыбатын дьиэтигэр элбэх оҕолоох ийэлэргэ Судаарыстыбаннай наҕарааданы CӨ Ил Дархана Айсен Сергеевич Николаев үөрүүлээх быһыыга-майгыга туттарда.
Ил Дархан күн күбэй ийэлэри кэлэн иһэр Аан дойду дьахталларын күнүнэн истиҥник эҕэрдэлээн туран дьиэ кэргэн бөҕөргүүрүгэр, демографическай балаһыанньа тупсарыгар, киһи-аймах элбииригэр сүдү кылааты киллэрсэр, үтүө холобурдарынан өрөспүүбүлүкэ сайдыытыгар, общественнай олоҕор күүс-көмө буолан, сүүрэ-көтө үлэлии-хамсыы сылдьар ийэлэргэ барҕа махтал тылларын анаата, ситиһиилэри баҕарда.
Нам улууһуттан үс эдэркээн элбэх оҕолоох ийэлэр “Ийэ Албан аата” II, III истиэпэнин ыллылар. Ол курдук, 2024 сыл кулун тутар 4 күнүнээҕи 229№ СӨ Ил Дархан Айсен Сергеевич Николаев Ыйааҕынан бигэргэнэн Үөдэй нэһилиэгиттэн 7 оҕо күн-күбэй ийэтэ Евгения Васильева, Нам сэлиэнньэтиттэн 7 оҕо ийэтэ Светлана Осипова “Ийэ Албан аата” III ист. бэлиэнэн, Таастаах нэһилиэгиттэн 8 оҕолоох күн-күбэй ийэ Тамара Панькова “Ийэ Албан аата” II ист.бэлиэнэн наҕараадаланнылар.
Наҕараадаламмыт ийэлэр ааттарыттан Үөдэй нэһилиэгиттэн Евгения Васильева үрдүк трибунаттан махтанан туран харда тылы эттэ.
Екатерина Эверстова, Үөдэй