Аан дойдутааҕы Оҕо көмүскэлин күнүгэр атах оонньуутугар өрөспүүбүлүкэҕэ бастыыр иһин күрэхтэһиигэ Нам улууһун сүүмэрдэммит хамаандата 2-с миэстэ буолла.
“Спортивные Якутяне” спартакиада суотугар киирэр атах оонньуутун кыайыылаахтара Норуоттар икки ардыларынааҕы VIII-с “Азия оҕолоро” оонньууга кыттыахтара.
Нам улууһун чиэһин Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолатын иитиллээччилэрэ көмүскээтилэр. Оҕолор чэпчэки атлетикаҕа аҕа тренер Николай Кейметинов салалтатынан дьарыктаналларын бэлиэтиибит.
Бэйэ туһугар күрэхтэһиигэ Нам оҕолорун ситиһиилэрэ:
— Матвеева Настя “кылыыга”, ыстаҥаҕа, “куобахха” кыһыл көмүс мэтээллэри кэтэн эрэллээхтик уопсай түмүккэ бастакы миэстэни ылла;
— Посельская Сайнаара “ыстаҥаҕа” – 3 миэстэ;
— Охлопков Вова “кылыыга”, ыстаҥаҕа, “куобахха” үс үрүҥ көмүстээх спортсмен “тимирдии” иккис миэстэ буолла;
— Тихонов Сандаар “куобахха” – 2 миэстэ.
“Атах оонньуутугар Попова Лена, Никольская Лида, Никонова Кира, Гуляева Карина, Максимова Альмира, Губский Юра, Охлопков Данияр куһаҕана суохтук ыстаннылар”, – диир “Олимпик” спорт оскуола дириэктэрэ Юрий Балаганскай.
Спортсменнары уонна тренердэри Николай Кейметиновы, Владислав Попову, Айхаллаан Местниковы уонна Екатерина Попованы эҕэрдэлиибит!