Нам улууһун Модутугар саҥа оскуоланы үөрүүлээхтик астылар

Бүгүн, тохсунньу 22 күнүгэр Нам улууһун Модут нэһилиэгэр 2 этээстээх – уопсайа 2871,6 кв.м. иэннээх, 150 үөрэнээччигэ миэстэлээх саҥа таас оскуола тутуллан бүппүтүн мэктиэлээн үөрүүлээх быһыыга-майгыга кыһыл лиэнтэни быстылар.

Модукка 1971 сыллаахха тутуллубут икки этээстээх типовой мас оскуола хаарбах туруктааҕынан бигэргэтиллибитэ. Күн бүгүҥҥээҥҥэ 120-чэ үөрэнээччи үс сиринэн үөрэнэн кэллилэр. Саҥа таас оскуола тутуутун бырайыактыыр үлэтэ 2016 сылтан саҕаламмыта. Оччолорго нэһилиэк баһылыгынан Петр Сокольников үлэлиирэ. Онтон ыла үгүс үлэ ыытыллан, СӨ инвестиционнай программатынан үбүлэнэн тутулунна. Эргэ оскуоланы олоччу көтүрэннэр, ол миэстэтигэр 2022 сыллаахха муус устар 19 күнүгэр саҥа оскуола бастакы тирэх сыбаайатын түһэрбиттэрэ.

Бары ирдэбилгэ эппиэттиир усулуобуйа тэриллибитэ олохтоохтор, учууталлар, төрөппүттэр, үөрэнээччилэр санааларын, сүргэлэрин көтөхтө. Оскуола бастакы олугун «Уйгу» ХЭТ (дир. В.И. Сивцев) саҕалаабытын «Намстрой» ХЭТ (ген. дир. В.В. Кутуков) ситэрэн, сүрүннээн тутта.

Кэтэһиилээх оскуола тутуллуута түмүктэммит, үөрүүнү үксэппит бэлиэтигэр Ил Дархан Айсен Николаев, оскуола директора Иван Тихонов, 11-с кылаас үөрэнээччитэ Петя Осипов аалай лиэнтэни быстылар. Саха сиэринэн, өбүгэбит үгэһинэн саҥа таас оскуола сылаас тыыннаах буоллун диэн аал уоту оттон, күөх буруону унаарытан Петр Охлопков алгыс сиэрин-туомун толордо. Ил Дархан Айсен Николаев, СӨ Ил Түмэнин председателэ Алексей Еремеев, «Нам улууһа» МТ баһылыга Юрий Слепцов эҕэрдэ тыл анаатылар, наҕараадалары туттартаатылар. Саҥа оскуола аһыллыбытын кэрэһэлиир күлүүһү «Намстрой» ХЭТ генеральнай директора Вадим Кутуков Модут орто агрооскуолатын директорыгар Иван Тихоновка туттарда.

Айсен Николаев, СӨ Ил Дархана:

Модут нэһилиэгэр үөрүүлээх күн буолла. Уһуннук күүтүллүбүт оскуола дьиэтэ тутуллан үлэҕэ киирдэ. Биһиги бэркэ өйдүүбүт, 70-с сылларга тутуллубут дьиэ хаарбаҕынан 2022 сыллаахха көтүрүллүбүтэ. Ол кэннэ Модукка оҕолор үс сиринэн үөрэнэ сылдьыбыттара. Элбэх туруорсуунан, биһиги президеммит В.В. Путин «Үөрэҕирии» национальнай бырайыагар киллэрэн, онтон үбүлээһин ыламмыт өрөспүүбүлүкэбит үбү-харчыны көрөн, бэртээхэй үчүгэй 3000 кэриҥэ кв.м иэннээх икки мэндиэмэннээх таас оскуола тутуллан үлэҕэ киирдэ. Тутааччыларга кылгас кэмҥэ үлэни үмүрүтэн тутан киллэрбиттэригэр махтанабыт. Бу олус үчүгэй дьиэҕэ оҕолор бэйэлэрин дьоҕурдарын арыйан, үчүгэйдик үөрэнэн ситиһиилэрдээх оскуола буоллун, учууталлар кыһаллан, үчүгэй дьиэҕэ-уокка маастарыстыбалара үрдээн инники сылларга улуустарын, өрөспүүбүлүкэлэрин ааттатар дьону иитэн таһаарыахтара диэн эрэнэбин уонна ис сүрэхпиттэн онно итэҕэйэбин.

Алексей Еремеев, СӨ Государственнай мунньаҕын (Ил Түмэн) председателэ:

— Модут нэһилиэгэр кэнники сылларга саҥа социальнай эбийиэк тутуллубатаҕа ыраатта. М.К. Аммосов аатынан сопхуос туруу үлэһит отделениета этэ. Тыа хаһаайыстыбата сайдыытыгар дьон бөҕө үрдүк таһаарыылаахтык, көрдөрүүлээхтик үлэлээбиттэрээ. Оччолортон нэһилиэккэ саҥа социальнай тутуу барбакка турар диэн олохтоохтор хомойоллор этэ. Кэнники сылларга «Сахам сирэ XXI үйэҕэ» үтүө дьыала өрөспүүбүлүкэтээҕи хамсааһын чэрчитинэн уһуйаан тутуллубута.

Саҥа оскуола тутуллуутугар бары көмөлөөммүт күүстээх үлэ ыытылынна. Элбэх оҕо, ыччат үөрэнэн нэһилиэктэригэр, улуустарыгар, өрөспүүбүлүкэҕэ туһалаах дьон иитиллэн тахсыахтара диэн эрэнэбит.

Юрий Слепцов, «Нам улууһа» МТ баһылыга:

— Саҥа оскуола тутуллуутун боппуруоһа Модут нэһилиэгэр сытыытык турбута ыраатта. Оскуола эргэрэн, нэһилиэк оҕолоро үөрэнэллэригэр, учууталлар үлэлииллэригэр үгүс ыарахаттары  үөскэппитэ. Бырайыак оҥоруутун үлэтэ саҕаламмыта ыраатта, онтон Петр Григорьевич Сокольников баһылыктыы олорон ону салҕаан тиһэҕэр тириэрдибитэ. Салгыы үлэни нэһилиэк саҥа баһылыга Ефим Ефимович Гоголев ыыппыта. Бырайыакпыт экспертизаны ааһан бигэргэммитин кэннэ биһиги депутаппыт Алексей Ильич Еремеев салгыы ылсан, оскуола тутуутун өрөспүүбүлүкэ инвестпрограмматыгар киллэрэри ситиспитэ. Нам улууһун салалтата уонна дьоно-сэргэтэ Модукка оскуола наадатын уруккуттан өйдүүр уонна өйүүр этибит. Онон бары биир хамаанда буолан түмсэн, бииргэ үлэлээн-хамнаан бастакы сыбаайата түспүтэ.

Бэлиэтээн этиэм этэ, бу эбийиэк тутуутугар олохтоох тэрилтэлэр ылсан үлэлээбиттэрэ. Төһө да ааспыт сылга улахан халаан уута кэлэн дьон дьиэтин-уотун, хаһаайыстыбатын өрө тардыы түбүгэр сырыттар, Модут дьоно-сэргэтэ оскуола тутуутугар кылааттара сүҥкэн улахан. Кинилэр өрөмүөн, ырастаныы үлэтигэр, субуотунньуктарга биир санаанан саба түһэн үлэлээн-хамнаан, бу оскуола бириэмэтигэр үлэҕэ киирбитэ улуус дьоно түмсүүлээҕин сырдык туоһута буолла.

Элбэх сыллар устата ыра санаа оҥустубут санаабыт олоххо киирбитэ дьону-сэргэни наһаа үөрдэр уонна инникигэ кынаттыыр.

Ефим Гоголев, «Модут нэһилиэгэ» МТ баһылыга:

Нэһилиэнньэ урут-уруккуттан туорарсар туруорсуута олоххо киирдэ. Саҥа оскуоланы туттарыыга Владимир Иванович директордыырын саҕаттан үлэ барбыта. Онтон Петр Сокольников нэһилиэк баһылыгынан талыллан баран, Мария Суздаловалыын күүскэ үлэлээбиттэрэ. Ол кэмҥэ Нам улууһун баһылыгын тутуу салаатыгар солбуйааччы Степан Матвеев бырайыак үлэтигэр күүс-көмө буолбута. Олохтоохтор кыһалҕаларын чугастык ылынан Ил Түмэн председателэ Алексей Еремеев көмөлөспүт өҥөтө улахан. Саҥа оскуола тутуллуутугар быһаччы үлэлэспит дьоммутугар, улууспут уонна өрөспүүбүлүкэбит үрдүкү салалтатыгар махталбытын тиэрдэбит. Үөрэнээччибит элбиэҕэ, үөрэх хаачыстыбата үрдүк көрдөрүүлээх буолуоҕа диэн эрэнэбит.

Петр Сокольников, 2017-2021сс. Модут нэһилиэгин баһылыга:

Нэһилиэккэ баһылыгынан талыллан баран саҥа оскуоланы туттарыы боппуруоһа турбута. Толкуйдаан баран бастатан туран генплаҥҥа киллэрбиппит. Нэһилиэнньэ мустан ханна тутары быһаарбыппыт. Докумуон үлэтигэр олохтоохтор бары кылааттарын киллэрсибиттэрэ. Оччолорго оҕо ахсаанын учуоттаан, инникини сабаҕалаан оскуола 150 миэстэлээх буоларын быһаарбыппыт. Проекка «Сахапроект» тэрилтэни кытары үлэлэспиппит.

Модут нэһилиэгин үөрэнээччилэрэ саҥа дьэндэйбит оскуолалара оҥкул буолан туйгун сыанаҕа үөрэниэхтэрэ, билиилэрэ-ситиһиилэрэ өссө сураҕырыа диэн эрэнэбит.

Семен Аргунов

Читайте дальше