Нам улууһун наставниктарын сүбэтин үлэтин уопутун билсиэхтэрэ

Тохсунньу 29 күнүгэр Дьокуускайга СӨ наставниктарын сүбэтин салайааччытын солбуйааччы Божедонова А.Н. көҕүлээһининэн СӨ профсоюзтарын Федерациятын председателэ Н.Н. Дегтярев  кытта көрсүһүү тэрилиннэ. Сүбэ мунньахха наставниктар өрөспүүбүлүкэтээҕи сүбэтин салайааччылара, чилиэннэрэ А.Н. Божедонова, А.В. Пермякова, М.Н. Габышева, З.Р. Бочкарева, ону таһынан Уус Алдан, Нам улуустарын  наставниктарын сүбэлэрин председателлэрэ Н.Г. Говорова, А.С. Заболоцкая кыттыыны ыллылар.

Манна улуустарга общественнай наставниктар үлэлэрэ тэриллэн саҕаламмытын, ол  гынан баран сокуон өттүнэн өйөбүл үлэ коллективтарын иһинэн эрэ тэриллибит наставниктар сүбэлэригэр баарын ыйан туран, общественнай наставниктар сүбэлэрин сүрүннүүр, өйүүр салалта наадатын тула кэпсэтии, ырытыы буолла.

Саҕаламмыт үлэ хаамыытын билиһиннэрдилэр, ол курдук олох үтүө үгэстэрин үйэтитиигэ, эдэр ыччаты дойдуну таптыырга, патриотическай  тыыҥҥа иитэргэ үлэни кэлимник ыытар наадатын тоһоҕолоон бэлиэтээтилэр.

Кэпсэтии түмүгүнэн Нам улууһун наставниктарын сүбэтин, нэһилиэктэрдээҕи сэбиэттэрэ ыыппыт үлэлэрин уопутун билсэ төгүрүк остуолу ыытарга быһаарыы ылыммыттар. Манна  СӨ профсоюзтарын Федерациятын уонна СӨ социальнай сайдыыга, үлэҕэ министиэристибэтин бэрэстэбиитэллэрэ кытталлара күүтүллэр, күнэ чопчуланыа.

Нам наставниктарын улуустааҕы сүбэтэ

Читайте дальше