Нам улууһун оҕолоругар төрүт ох саанан ытыыга күрэхтэһии үһүс төгүлүн ыытыллар

Хамаҕаттаҕа “Эрчим” спорт комплекска төрүт ох саанан ытыыга оҕолорго Моруос оҕонньор бирииһигэр күрэхтэһии буолбут. Улуус оҕолоругар үһүс төгүлүн ыытыллар күрэхтэһиигэ тохсунньу 11 күнүгэр спорт комплекска барыта 22 эдэр ытааччы кыттыыны ылбыт.

“Күрэхтэһээччилэри төрүт ох саанан ытыыга үс бөлөххө арааран ыттардыбыт”, – диир тэрийээччилэртэн биирдэстэрэ Петр Калачев.

Күрэхтэһиигэ 22 оҕо кыттыыны ылбыта, улууска төрүт ох саанан ытыы көрүҥэр үлэ барарыттан баҕалаах оҕо элбиирэ көстөн тахсар. Холобура, баҕалаах оҕолор ох саанан сөптөөхтүк ыталларыгар кэргэнниилэр Катарина Колесова, Петр Калачев бэйэлэрин билиилэрин тарҕаталлар, уһуйаллар. Катарина Афанасьевна Хамаҕаттаҕа, Партизаҥҥа эрчийэр, Петр Петрович Намнааҕы 1-кы нүөмэрдээх оскуолаҕа дьарыктыыр.

Нам улууһугар төрүт ох саа эрчимэ күүһүрэ турарыгар Саха сирин спордун маастара Эрилик Күндайаана аата ааттаныан ааттанар. Ол курдук, нэһилиэнньэ ох сааҕа болҕомто, интэриэс уурарыгар Эрилик Күндайаана Хамаҕаттаҕа ох саанан ытарга аналлаах хонуу арыйбыта.

Кыра саастаах бөлөх оҕолоругар иккис, үһүс бириистээх миэстэлэри Партизан оҕолоро Иванова Алиа – 3 миэстэ уонна Слепцова Милена – 2 ылбыттар. Кыайыылаах Модуттан Шергина Мичийэ ааттаммыт.

Орто саастаахтарга Хамаҕатта эдэр ытааччылара: Шелковникова Мичийэ – 3 миэстэ; Трапезникова Ева – 2 миэстэ уонна Иванова Муся – 1 миэстэ.

Улахаттарга улууспут үс киин нэһилиэктэрин оҕолоро үллэстэллэр. Боруонса мэтээли Хамаҕаттаттан Шелковникова Мичийэ кэтэр. Үрүҥ көмүһү Попова Катя Аппааныга илдьэ барар. Күрэхтэһии кыһыл көмүс мэтээлин Матвеева Оля Нам сэлиэнньэтигэр аҕалар.

Кыра уолаттарга үһүс нүөмэр Намтан Прокопьев Степа, иккис нүөмэр Хамаҕаттаттан Никитин Артем уонна бастакы нүөмэр Намтан Сивцев Виталий ааттаналлар.

Улахан уолаттарга үс кыраҕы харахтаахтарга Хамаҕаттаттан Аввакумов Серафим (3 м), Винокуров Рома киирэллэр. Улуустааҕы төрүт ох саанан ытыы күрэхтэһиитигэр бастыҥ ытааччынан Нам уола Иванов Ростислав буолар.

“Кыһыҥҥы сынньалаҥҥа Моруос оҕонньор бирииһигэр сылын аайы күрэхтэһии сыллата ыытылларыгар былааҥҥа киллэттэрэргэ үлэлэһэбит. Оччотугар күрэхтэһии таһыма улаатан, үрдээн кыттааччылара элбиэ турдаҕа.

Саха сирин үрдүнэн ылан көрдөххө, оҕолорго ох саанан ытыыга күрэхтэһиилэр бүгүҥҥү күҥҥэ оннук элбэх ыытыллыбат. Оҕолору уопсай буолар күрэхтэргэ киллэрэн биэрээччилэр. Оҕолору кытыннарар, күрэхтэһиннэрэр буолбуттара тута билиннэ: ытыы, табыы таһыма лаппа таҕыста. Холобура, спорт маастарыгар кандидат нуорматын толорбут оҕолор биирдиилээн улуустарынан бааллар.

Күрэҕи тэрийэргэ Катарина Колесова, Эрилик Күндайаана, “Олимпик” спорт оскуола специалиһа Юлия Гоголева күүстэрин уурбуттарыгар уонна көмөлөрүн биллэрбит бары дьоммутугар махтанабыт”, – диэн кэпсиир Петр Петрович.

Харысхан Попов

Читайте дальше