Дьокуускайга СӨ Оҕо саас сылын сабыы уонна Саха сиригэр Ийэ дойдуну көмүскээччи сылын биллэрэр үөрүүлээх тэрээһиҥҥэ намнар кыттыыны ыллылар.
Ю.А. Гагарин аатынан култуура уонна аныгылыы искусство киинигэр тохсунньу 28-29 күннэригэр спорт эйгэтигэр оҕону кытта үлэлэһэр бастыҥ көрдөрүүлээх тэрилтэлэр бэйэлэрин ситиһиилэрин кэпсиир быыстапка туруорбуттар.
“Нам улууһугар 2024 сыллаахха Оҕо спордун сыла ааспыта. Бу сылга Намнааҕы Оҕо спордун киинэ арыллыбыта. Биһиги оҕолорбут өрөспүүбүлүкэтээҕи күрэхтэһиилэргэ үчүгэй көрдөрүүнү ситиспиттэрэ. Манан сиэттэрэн, Саха сирин салалтата Нам улууһун үөрүүлээх тэрээһиҥҥэ ыҥырбыттара”, – диир Намнааҕы Оҕо спордун киинин дириэктэрэ Юрий Балаганскай.
Намнааҕы Оҕо спордун кииниттэн Юрий Балаганскай, Зафар Асоев уонна улуустааҕы “Олимпик” спорт оскуола дириэктэрэ Изабелла Массаева улууска Оҕо спордун сыла хайдах ааспытын, туох тэрээһиннэр, күрэхтэһиилэр ыытыллыбыттарын, Намнааҕы Оҕо спордун киинэ хайдах тэриллибитин туһунан толору кэпсээн билиһиннэрбиттэр.
Саха сиригэр Ийэ дойдуну көмүскээччи сылын арыйыы күнүгэр Нам улууһа туруорбут быыстапкатын Россия Геройдара, СӨ Правительствотын председателин солбуйааччы Анатолий Семенов, СӨ Үөрэҕин уонна наукатын министрэ Нюргуна Соколова, СӨ Култуураҕа уонна духуобунай сайдыыга министрэ Афанасий Ноев, СӨ Ыччат министрин э.т. Игорь Юргин, Ил Түмэн депутаттара интэриэһэргээбиттэр, сэргээбиттэр, кэккэ ыйытыылары биэрбиттэр, хайҕаабыттар.
Харысхан Попов