Саха сиригэр бүгүн оһуохай күнэ биллэрилиннэ. Ол курдук, бары улуустар бэлиэ күҥҥэ илии-илиилэриттэн сиэттиһэн оһуохай толордулар. СӨ Ил Дархана Айсен Николаев “Норуоппутун арчылыыр, араҥаччылыыр, сомоҕолуур аналлаах оһуохайбыт үйэлэргэ дуорайа туруохтун!” диэн эҕэрдэлээтэ.
Саха Сиригэр маҥнайгытын тэриллибит оһуохай күнэ бары оскуолаларга Тиһэх чуорааны кытта ситимнэннэ. Онуоха бэлиэ күнү кытта сөп түбэһиннэрэн Нам улууһун үгүс оскуолата ыам ыйын 25 күнүгэр ыһыах тэрийдэ, оһуохай таһаарда.
Оттон Нам сэлиэнньэтигэр Ленскэй нэһилиэк баһылыга Петр Сокольников олунньу бастакы бээтинсэтин оһуохай күнүнэн биллэрбитин бэлиэтиибит.
Афанасий Шестаков аатынан улуустааҕы култуура киинин үлэһитэ Вера Цыпандина Үөдэй нэһилиэгин үөрэнээччилэрин кытта төгүрүйэ тураннар оһуохай тылын таһаарда. Бэлиэтээтэххэ, Үөдэй оскуолатыгар СӨ култууратын миниистрэ Афанасий Ноев күндү ыалдьыт буолла.
Оттон Хатыҥ Арыы оскуолатын Тиһэх чуораана ыһыаҕынан түмүктэммит. Алгыһы, оһуохай тыллары П.П. Ядрихинскай-Бэдьээлэ аатынан Намнааҕы Олоҥхо дьиэтин үлэһитэ Владимир Сыромятников-Дьиэрэй таһаарда.
Харысхан Попов