Нам улууһугар комплекснай спартакиада түмүктэннэ. Улууска Оҕо спорда биллэриллибитинэн, быйылгы нэһилиэктэр икки ардыларыгар ыытыллар сайыҥҥы спартакиадаҕа баар көрүҥнэргэ оҕолор кыттыыны ылбыттара.
2024 сыллааҕы комплекснай спартакиадаҕа төрүт ох саанан ытыыга Катерина Колесова уонна Петр Калачев иитиллээччилэрэ кыттыыны ыллылар. Ол курдук, төрүт ох саанан ытыыга оҕолорго Хатыҥ Арыыттан Попова Катя кыайыылаах таҕыста. Оттон уолаттарга уопсай түмүгүнэн кыайыылааҕынан Үөдэй эдэр охчута Гаврильев Айаал ааттанна.
“Попова Катя тииҥ түһүмэҕэр 1 миэстэ, куска 1 миэстэ, куобаҕы табыыга 2 миэстэ буолан эрэллээхтик бастаата. Уопсай түмүгүнэн, иккис үрдэлгэ Ермолаева Нарыйаана 2 миэстэ буолла. Оттон Корякина Санаайа куобах түһүмэҕэр 3 миэстэни ылла. Уолаттарга Винокуров Рома тииҥи ытыыга – 1 м., куобахха 2 м. Инньэ гынан, уопсайга – 2 миэстэҕэ таҕыста. Ленскэй нэһилиэк ытааччыта Ростислав Иванов уопсайга – 3 миэстэ.
Төрүт ох саанан ытыы күрэхтэһиитигэр саамай кыра саастаах охчуттар Партизан нэһилиэгиттэн бааллар – Милена 3 кылааһы, Эрхан 4-с кылааһы бүтэрдилэр”, – диир Петр Калачев.
Харысхан Попов