Хамаҕаттатааҕы Н.П. Габышев аатынан “Эрчим” спорт саала муус устар 20 күнүгэр оҕолору “Зарница 2.0” спорт оонньуутугар түмтэ. Бүтүн Россиятааҕы Флагманскай бырайыак улуустааҕы түһүмэҕэр 100-тэн тахса эдэр дьон кытынна.
“Спортивнай оонньуу Пионерскай зарница үтүө үгэстэрин холбуур. 6 түһүмэхтэн турбут оонньууга бастыҥнар билиннилэр. Оҕолорбутун аан маҥнайгытын улууска ыытыллыбыт “Зарница” оонньууга кыттыбыттарынан эҕэрдэлиибит”, – диир Бүтүн Россиятааҕы оҕолор уонна ыччат хамсааһыннарын олохтоох салаатын специалиһа Сахаяна Васильева.
Алта түһүмэх көрдөрбүтүнэн, улаатан эрэр оҕолорго бастыҥынан 1 Хомустаах оҕолоро ааттаммыттар. Иккиһи Хатыҥ Арыы хамаандата ылбыт уонна үһүс көрдөрүүлээх Хамаҕатта оҕолоро буолаллар.
Кыайыылаахтар муус устар 24-26 күннэригэр өрөспүүбүлүкэтээҕи “Зарница” спортивнай оонньууга Горнай улууһугар күрэхтэһэ айанныахтара.
Харысхан Попов