CӨ наукатын Алын академиятыгар “Большие вызовы” диэн Бүтүн Арассыыйатааҕы научнай-технологическай бырайыактар куонкурустарын региональнай финалын түмүктүүр тэрээһин буолла. Бэлиэ түгэҥҥэ кыайыылаахтары уонна бириистээх миэстэҕэ тиксибит оҕолору наҕараадалаатылар.
Н.С. Охлопков аатынан Намнааҕы гимназия 7-с кылааһын үөрэнээччитэ Сайаана Москвитина «Мобильное приложение школьного музея Намской улусной гимназии» бырайыагынан кыттан 2-с бочуоттаах миэстэни ылан, улууһун аатын ааттатта. Маны тэҥэ, Сайаана куонкурус партнердара “Синет парк” үтүөнү оҥорор фонда уонна «Алмазэргиэнбанк» АКБ анал бириистэринэн наҕараадаланна. Саха өрөспүүбүлүкэтин кэлэр көлүөнэтин тус сыаллаах фондатын генеральнай дириэктэрэ Владимир Егоров экспертнэй сэбиэт анал бирииһин Сайаанаҕа үөрүүлээх быһыыга туттарда.
Оттон Намнааҕы 2-с №-дээх орто оскуола 11-с кылааһын үөрэнээччитэ Анатолий Федоров “Большие вызовы” Бүтүн Арассыыйатааҕы научнай-технологическай бырайыактар куонкурустарыгар 3-с миэстэни ылла.
Үөрэнээччилэри научнай-технологическай чинчийиигэ угуйар, кэскиллээх технологиялары бырайыактыырга үөрэтэр уонна дойду социальнай- экономическай сайдыытыгар көмөлөһөр суолталаах куонкуруска оҕолорбут ситиһиилээхтик кыттыбыттарынан эҕэрдэлиибит.
Майя Федорова