Намҥа өрөспүүбүлүкэ бастыҥ олоҥхону толорооччута Аксиния Степанова ыалдьыттаата

П.П. Ядрихинскай-Бэдьээлэ аатынан Намнааҕы Олоҥхо дьиэтигэр Мэҥэ Хаҥаластан Саха сирин үтүөлээх оһуохайы таһаарааччыта Аксиния Степанова уонна хомус маастара, хомус ууһа Роман Иванов ыалдьыттаатылар. “Дьоруойдар удьуордара” диэн ааттаммыт тэрээһин саха норуотун култууратынан салаллыбыт.

Ол курдук, Саха сиригэр Олоҥхо декадата түмүктэнэр дьоро күнүгэр СӨ култууратын туйгуна Аксиния Степанова эһэтэ Николай Иванович Степанов-Ноорой олоҥхотуттан быһа тардан олоҥхо толорбутун, хомуска оонньообутун, тойуктаабытын уонна оһуохай тылын таһаарбытын Олоҥхо дьиэтин дириэктэрэ Вера Колпашникова этэр. Норуот култууратын өрө тутар кыыска Тааттаттан тардыылаах Роман Иванов кырыымпаҕа оонньоон доҕуһуоллаабыт. Киниэхэ Наммыт улууһун кырыымпаһыттара Руслан Захаров уонна Руслан Павлов көмөлөспүттэр.

Бэлиэтээн эттэххэ, өрөспүүбүлүкэ бастыҥ олоҥхону толорооччута, “Олоҥхо баттл-2024” кыайыылааҕа Аксиния Степанова Нам улууһун кытта сибээстээҕин Вера Васильевна чопчулуур. Ол курдук, Мэҥэ Хаҥалас олоҥхоһута Николай Иванович Степанов-Ноорой кэргэнэ Степанова-Леонтьева Дарья Николаевна 2 Хомустаах олохтооҕо буолар. Бу курдук, Саха сирин олохтоохторо бары даҕаны, улуус улууһу ситимниир, Эйэ муостатын уурар дьоннор буоларбытын умнумуохха.

“Биһиги Аксиния Степанованы Олоҥхо дьиэлэрэ биир ситимҥэ киириэхтэрин инниттэн сибээс туппуппут, алтыспыппыт. Аксиниялыын үгүс таһымнаах тэрээһиннэргэ бииргэ сылдьан ыкса билсибиппит.

Олоҥхо декадатын түмүктүүр дьоро күммүт Аксиния Степанова уонна Роман Иванов түһүлгэтин киэргэттилэр. Ону тэҥэ, Амма улууһуттан Эмис нэһилиэгин Олоҥхотун дьиэтин дириэктэрэ Анжелика Александровна кыттыыны ылла. Россияҕа Дьиэ кэргэн сылынан, Ил Дархан ыйааҕынан Олоҥхо дьиэлэрэ биир ситимҥэ киириилэрэ – аймахтары булуһуннарда”, – диэн кэпсиир Вера Васильевна.

Харысхан Попов

Читайте дальше