Нам сэлиэнньэтигэр олунньу 7 күнэ – оһуохай күнэ. Ол курдук, бу күн М.К. Аммосов аатынан култуура дыбарыаһыгар, И.Е. Винокуров аатынан Намнааҕы педагогическай колледжка оһуохай үҥкүүтүн оройуттан туттулар.
Оһуохай үҥкүүтэ киэҥник тарҕанарыгар Ленскэй нэһилиэк баһылыга Петр Сокольников оруола улахан. Ленскэй нэһилиэк баһылыгын 2023 сыл тохсунньу 18 күнүнээҕи дьаһалынан Саха сиригэр аан маҥнайгынан “Оһуохай күнэ” диэн баар буолбута.
Култуура дыбарыаһыгар Улуу Кыайыы 80 сылынан “Уруйдан, Кыайыы Оһуохайа” күрэххэ оҕолор уонна улахан дьон кыттыыны ыллылар. Оттон Намнааҕы педагогическай колледжка П.П. Ядрихинскай-Бэдьээлэ аатынан Намнааҕы Олоҥхо дьиэтэ уонна алгысчыт Дария Романова тэрийиилэринэн “Күн Оһуохайа” ыытыллыбыта хаһыс да сыла.
Нам сириттэн-уотуттан күүс ылбыт, эрчимирбит Оһуохай үҥкүүтэ Дьокуускайга олунньу 9 күнүгэр 13.00 чаастан “Арчы” дьиэтигэр буолара былааннанар.
Көлүөнэттэн-көлүөнэҕэ бэриллэригэр үлэлэр тохтоло суох ыытыллаллар: саха фольклорун тарҕатыы, төрүт үҥкүүнү ыччакка иҥэрии. Балысханнаах сайдыы бара турар кэмигэр төрүт үгэстэрбит симэлийэ сүтэн-оһон умнууга хаалбаттарын туһуттан, төрүт култуурабытын кэнэҕэски ыччат билэн, көрөн бигэтик тутан хаалыахтаах. Биллэн турар, Намҥа оһуохай сайдан тахсарыгар төһүү күүһү ыччат биэриэҕэ.
“Намнааҕы педагогическай колледж үөрэнээччилэригэр саха төрүт култууратын билиһиннэрэбит: өбүгэлэрбит ырыаларын-тойуктарын, оһуохайбыт үҥкүүтүн хамсаныыларын. Устудьуоннарга оһуохай сылга биирдэ эрэ ыытыллыбат. Холобура, билигин номнуо, педколледжка балачча оһуохайдьыт оҕо баар”, – диир Олоҥхо үлэһитэ Туйаара Мегина.
Урукку кэмнэргэ “Күн Оһуохайа” тэрээһиҥҥэ “Эҥсиэли” оһуохай түмсүүттэн Нам улууһун Дархан этээччитэ Владимир Осипов уонна Валентин Хорунов тыл таһаарар эбит буоллахтарына, быйылгы оһуохайы Олоҥхо дьиэтин фольклорга специалиһа Руслан Павлов таһаарбыт. Ону тэҥэ, Олоҥхо дьиэтин кытта ыкса үлэлэһэр маастардар Руслан Захаров, Андрей Осипов доҕуһуоллааннар күүс-көмө буолбуттар.
Нам улууһун баһылыга Юрий Слепцов салайааччылаах ыалдьыттары сахалыы сиэринэн алаадьынан, кымыһынан күндүлээн көрсүү.
Оһуохай үҥкүүтүн эт хараххытынан көрүҥ, сыаналааҥ диэбиттии, саха норуотун төрүт култууратын билсэр соруктаах Россия куораттарын баһылыктарын “Школа мэров” бөлөҕө Нам улууһугар ыалдьыттаата. Кинилэр күн устата биһиги улууспут үлэ ыытар бары хайысхатын көрбүттэр-истибиттэр.
Харысхан Попов