Бүгүн Нам улууһугар Саха сирин промышленнай компанияларыгар уонна улуус иһинээҕи кэккэ тэрилтэлэргэ үлэҕэ аһаҕас сүүмэрдээһини ыыттылар.
«Олохтоох кадры промышленноска» бырайыагы олоххо киллэрии чэрчитинэн көһө сылдьар тэрээһин буолла. Бу күн Саха сирин бөдөҥ промышленнай компаниялара: «Якутуголь» АО ХК, «Профресурс» АНО ДПО уонна Нам улууһун тэрилтэлэрэ – Намнааҕы киин балыыһа, «Якутлесресурс» ГАУ Намнааҕы филиала кыттыыны ыллылар. Итиэннэ, Дьокуускайдааҕы уу транспорын институтуттан представителлэр кэлэннэр Нам 1-кы уонна 2-с №-дээх оскуолаларга үөрэнээччилэри көрсөн идэҕэ туһаайар бэсиэдэ ыыттылар, үөрэххэ туттарсыы ирдэбилин билиһиннэрдилэр.
Бу бырайыак чэрчитинэн Сахабыт сирин улуустарыгар үгүс үлэни ыыталлар. Ол курдук, бүгүҥҥү бөлөҕү СӨ Нэһилиэнньэ дьарыктаах буолуутугар государственнай комитет председателин бастакы солбуйааччыта Анастасия Позднякова салайан илдьэ сырытта.
Гаврил Николаев, Намнааҕы дьарыктаах буолуу киинин салайааччыта: «Наммыт улууһугар үлэтэ суох дьон дьарыктаах буолууларыгар ситимнээх үлэни көдьүүстээхтик ыытабыт дии саныыбын. «Олохтоох кадры промышленноска» бырайыак чэрчитинэн биһиэхэ учуокка турар дьону анал үөрэхтэргэ ыытан, идэлээхтэри промышленнай копманияларга о.д.а. тэрилтэлэргэ үлэҕэ киирэллэригэр күүс-көмө буолабыт. Сылын аайы маннык тэрээһини ыытан, үлэ көрдөнөөччү тэрилтэлэр представителлэрин кытары сирэй көрсөн олорон кэпсэтэллэрин тэрийэллэрэ, тута докумуоннары тутан бараллара быдан суолталаах буолар.
Ааспыт 2023 сылга учуокка турар дьоммутуттан 195 киһи промышленнай компанияларга үлэҕэ киирбиттэрэ. Ол курдук, «Алмазы-Анабара» АО – 51, «Артик Капитал» ООО – 39, «АК «Железные дороги Якутии» АО – 9, «ЭльгаУголь» ООО – 15, «Южно-верхоянская горнодобывающая компания» АО – 7, «Якутуголь» АО ХК – 3, «Сахатранснефтегаз» АО – 16, «Якутсэнерго» ПАО – 4, «Таас-Юрях Нефтегаздобыча» ООО – 5, «УК «Колмар» ООО- 11 киһи о.д.а. тэрилтэлэргэ үлэнэн хааччыллыбыттара.
Онтон 2024 сылга киирэн баран учуокка турар үлэтэ суох дьонтон 9 киһи промышленнай тэрилтэлэргэ үлэҕэ киирдэ: «Эльга-Фабрики3» ООО — 1, «ЯНОЛОВО» ООО – 1, «Алмазы-Анабара» АО – 4, «ЯНЗОЛОТО» ООО – 1, «Дорожное эксплуатационное предприятие №135» — 1, «АДК» ООО – 1 киһи. Салгыы үлэ ыытыллар, күннэтэ Намнааҕы дьарыктаах буолуу киинигэр кэлэн билсиэххитин, эбэтэр тэрилтэлэр сайтарыгар киирэн үлэ миэстэтин көрүөххүтүн сөп».
Бүгүҥҥү көрсүһүүгэ тэрилтэлэр үлэҕэ ылар ирдэбиллэрин кэпсээтилэр, «Профресурс» үөрэх киинэ ханнык идэҕэ үөрэтэллэрин билиһиннэрдилэр. Намнааҕы техникум студеннара бөдөҥ промышленнай компанияларга, тэрилтэлэргэ практикаларын ааһалларыгар үлэлэһэргэ этии киллэрдилэр. Кэлбит дьон тэрилтэ представителлэрин кытары сирэй көрсөн кэпсэттилэр, анкета толорон туттардылар.
Семен Аргунов