Муус устар 2-3 күннэригэр Суолунан сибээстэһии Уһук Илиҥҥи государственнай университекка тус сыаллаах (целевой) миэстэлэргэ үөрэнэр туһугар предметнэй олимпиада буолан ааста.
Олимпиада түмүгүнэн хас биирдии предмеккэ биэс бастыҥ кыттааччыга, уопсайа 15 киһиэхэ, сертификат бэриллибит. Бу сертификат Суолунан сибээстэһии Уһук Илиҥҥи государственнай университекка үөрэххэ туттарсааччыларга биир кэлим эксээмэннэригэр 10 баалы эбиэҕэ.
Намнааҕы 2-с №-дээх орто оскуолатын үөрэнээччитэ Артур Окоемов информатика олимпиадатыгар саамай улахан баалы ылбыт. Оттон Саймыына Сивцева математика уонна информатика предметтэригэр икки сертификат ылан, бу үрдүк үөрэх кыһатыгар тус сыаллаах миэстэҕэ үөрэххэ киирбит.
Алдаҥҥа ыытыллыбыт олимпиада тэрийээччилэрэ – “Железные дороги Якутии” акционернай компания, СР Үөрэҕин уонна наукатын министерствота уонна Уһук-Илиҥҥи государственнай университет. Олимпиадаҕа 8 улуустан: Горнайтан, Мэҥэ Хаҥаластан, Амматтан, Тааттаттан, Ньурбаттан, Намтан, Алдантан уонна Дьокуускай үс оскуолатыттан уопсайа 43 оскуоланы бүтэрэр оҕо кыттыбыт.
«Эҥсиэли» хаһыат