Намнааҕы Олоҥхо дьиэтэ гимназистарга төрүт культураны сырдатта

П.П. Ядрихинскай-Бэдьээлэ аатынан Намнааҕы Олоҥхо дьиэтэ Ийэ тыл, сурук-бичик нэдиэлэтигэр нэһилиэнньэҕэ тэрээһиннэри ыытта. Быйыл буоларын курдук, сылын аайы ыытыллар “Олоҥхо бэргэн тыла” тэрээһин улуустааҕы гимназия үөрэнээччилэригэр буолбут.

Олоҥхо дьиэтин үлэһиттэрэ Туйаара Мегина, Октябрина Колесова уонна Владимир Сыромятников гимназия 50-тэн тахса оҕолоох интернатыгар тиийэннэр алгыс сиэрин-туомун кэпсээбиттэр, саха итэҕэлин туһунан билиһиннэрбиттэр.

Үөрэнээччилэр 15-тии буолан “Күн” уонна “Ый” диэн хамаандаларга арахсаннар түөрт түһүмэхтээх өйү тургутууга күрэхтэспиттэр. Саха фольклорун тарҕатааччылар бэлиэтииллэринэн, оҕолор саха суруйааччыларыгар, айымньыларыгар билиилэрэ-көрүүлэрэ киэҥ эбит. Хамаандалар ордук сахалыы киинэни таайыы түһүмэҕэр күннээбиттэр.

Быйыл аатырбыт олоҥхоһут Василий Попов-Бочоох үбүлүөйдээх сыла. Үгүспүт маны билбэт буолуон сөп, олоҥхоһут Буоратай П.П. Ядрихинскай-Бэдьээлэ маҥнай олоҥхолоон саҕалыырыгыр элбэххэ үөрэппит эбит.

“Оҕолор ыарырҕаппыт ыйытыыларын тута, миэстэтигэр ырыппыппыт. Холобура, Нам улууһун олоҥхоһуттарын, олохторун, айар үлэлэрин сырдаппыппыт”, – диир Туйаара Мегина.

Харысхан Попов