Нам улууһугар өрөспүүбүлүкэтээҕи Олоҥхо күннэрин чэрчитинэн, ааттаах-суоллаах олоҥхоһут Г.С. Кычкин-Хабыанньа төрөөбүтэ 135 сылыгар аналлаах «Олоҥхонон ыччаты иитии» быыстапка-куонкурус П.П. Ядрихинскай-Бэдьээлэ аатынан Намнааҕы Олоҥхо дьиэтигэр буолла.
«Олоҥхонон ыччаты иитии» быыстапка-куонкуруска бэйэ илиитинэн оҥорбут Түбэтээҕи модельнай библиотека сэбиэдиссэйэ Людмила Григорьева; З.П. Винокуров аатынан Оҕо искусствотын оскуолатын иитиллээччилэрэ Иванова Нелли, Матвеева Оля; “Түөлбэ” оҕо кииниттэн Ядреев Рустам; улуустааҕы гимназияттан Мегина Дайаана; Вера, Рустам Федоровтар үлэлэрин көрдүбүт.
Кыттааччылар бука бары олоҥхоҕо уонна саха остуоруйатыгар сыһыаннаах оонньуулары, оонньуурдары хайдах быһыылаахтык оҥорбуттарын кэпсээтилэр. Оччотугар кэлэр ыччат оонньууларынан, оонньуурдарынан олоҥхону, саха төрүт култууратын билэ, үөрэтэ улаатыа диэҥҥэ тэрийээччилэр эрэнэллэр.
Эрэл хаһан да сүтүө суоҕа. Ону бигэргэтэн улуустааҕы гимназия 5 кылааһын үөрэнээччилэрэ ыалдьыттааннар сахалыы оонньуулары олус сэргээтилэр. Холобура, уолаттар сыал ыттылар, аттары сүүртүлэр, күөрчэх эргиттилэр. Үөрэнээччилэртэн ыйытыыбар, саамай сөбүлээбиттэрэ, ордорбуттара күөрчэх ытыйыыта буолла. Аһары ылларан бириэмэҕэ бардылар. Муҥутуур үрдүк көрдөрүү, ытык 28 сөкүүндэ эргийдэ.
Кыайыылаахтар республикатааҕы Олоҥхо ассоциацията, Ленскэй нэһилиэк олохтоох дьаһалтата уонна Олоҥхо дьиэтэ туруорбут 20 тыһыынча солкуобай; 10 тыһ. солк.; 8000 солк.; 6000 солк. суумалаах бириистэринэн наҕараадаланнылар.
Бүгүҥҥү куонкурус Гран-при хаһаайыттарынан Федоровтар дьиэ кэргэн ааттанан 20 тыһ. сертификат туттулар. Кинилэр интэриэһинэй оонньууну оҥорон таһаарбыттар. Ол курдук, сүрүн дьоруойдары хаамтаран үрдүккэ дабайан кыайыылаах буолуохтаах эбиккин. Оонньуу ортотунан 30 мүн. уһуурун оонньууну айбыттар этэллэр. Вера, Рустам Федоровтар оҥорон таһаарбыттарын бэлэх быһыытынан Олоҥхо дьиэтигэр туттардылар.
“Абааһы кыыһын” үс нэдиэлэ кэриҥэ оҥорбут Иванова Нелли куукулатын атаҕар туруорарыгар ыарырҕаппыт. Оттон “Бухатыыры” айбыт Матвеева Оля куукула сирэйин чочуйарыгар уустуктары көрсүбүт.
Харысхан Попов
Быыстапка-куонкурус кыайыылаахтара “DNS” маҕаһыыҥҥа сертификат туттулар:
Гран-при – Федоровтар дьиэ кэргэн;
I үрдэл – Людмила Григорьева, 10 тыһ. серт.;
I үрдэл – Ядреев Рустам, 10 тыһ. серт.;
II үрдэл – Мегина Дайаана, 8 тыһ. серт.;
III үрдэл – Иванова Нелли – 6 тыһ. серт; Матвеева Оля – 6 тыһ. серт.