И.Е. Винокуров аатынан Намнааҕы педагогическай колледж бу дьыл бэс ыйын 11 күнүттэн «Ай-Кут» диэн уус-уран уонна спорт хайысхалаах сайыҥҥы лааҕыры үлэлэттэ.
Өрөспүүбүлүкэ араас улуустарыттан 44 оҕо сынньанан, үөрэнэн барда. Кинилэри «Дыгын оонньуута» уонна «Кыыс Куо» диэн икки хайысханан дьарыктаатылар. Уолаттар спортивнай хайысхаҕа спорт төрүт көрүҥнэригэр, кыргыттар уруһуй, иис, керамика кистэлэҥнэригэр үөрүйэхтэрин хаҥаттылар.
Бу курдук 12-тэн 16-гар диэри саастаах оҕолор 14 күн устата спордунан дьарыктаннылар, уус-уран эйгэни кытта билистилэр.
Лааҕыр программата араас үөрэтэр, сайыннарар тэрээһиннэринэн, оонньууларынан баай буолла. Онон оҕолорго көхтөөх сынньалаҥы таһынан, уус-уран кыахтарын сайыннарарга усулуобуйа олохтонно.
Алта этэрээт: «Сахалар», «Адреналин», «Нон-стоп», «Хотойдор», «Чемпионы», “Саха спорт” тэриллэн көхтөөх күннэр-дьыллар аастылар. Иитиллээччилэр күннээҕи ситиһиилэрэ, түмүктэрэ улахан экраҥҥа тахса турда. Ол чахчыларынан лааҕыр үлэтин бүтүүтүгэр «Лучший отряд» уонна «Лучший вожатый» номинацияларга кыайыылаахтар быһаарылыннылар.
Бу курдук И.Е. Винокуров аатынан Намнааҕы педагогическай колледж оҕолорго чаҕылхай, сэргэх сынньалаҥы бэлэхтээтэ уонна элбэххэ үөрэттэ. Бу туһунан колледж телеграм ханаалыгар суруйда.
“Эҥсиэли” хаһыат