Быйылгы 2025 сыллааҕы “Дыгын оонньуулара” саамай күүтүүлээх буоларынан биллэр. Дьокуускайга өссө 2024 сыллаахха ахсынньы 24-25 күннэригэр буолбут “Дыгын оонньууларын” сүүмэрдиир күрэхтэһиитигэр Нам улууһуттан Вячеслав Дьяконов, Владислав Попов уонна Кирилл Романов кыттыыны ылбыттара.
Владислав Попов Модут нэһилиэгэ, Нам улууһа киэн туттар спортсмена. Попов Владислав Владиславович 1995 сыллаахха Модут нэһилиэгэр Анна Ивановна уонна Владислав Николаевич Поповтар дьиэ кэргэттэригэр 4-с оҕонон күн сирин көрбүтэ. Поповтар соҕотох уоллара Владислав 2013 сыллаахха Модуттааҕы агрооскуоланы бүтэрбитэ.
Атах оонньуутунан 9 кылаастан дьарыктанан саҕалаабыт. Ити сыл маҥнай физкультура учуутала Сандулин Николай Николаевич улуус иһинээҕи күрэхтэһиигэ илдьэн ыстаннарбытыгар 3 көрүҥҥэ барытыгар 2-с миэстэ буолбут. Онтон ыла атах оонньуутун сөбүлээн, дьарыктанан 2013 сыллаахха “Манчаары оонньууларыгар” оҕолорго күрэхтэспит. Ити сыл Чурапчытааҕы физкультура институтугар үөрэнэр. Чиркоев Иван Иванович салалтатынан дьарыктанан сылы кыайбатынан спорт маастарын нуорматын толорбут. 2017 сыллаахха үөрэҕин бүтэрэн Чурапчыга үрдэтинэ салгыы үөрэнэр. 2019 сыллаахха магистратураны бүтэрэр. Ити үөрэнэр сылларыгар (2018 сыл) Нам улууһугар Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолаҕа үлэлии кэлэр.
“Быйыл холонон көрбүтүм иккис сыла. Маҥнай күрэхтэһэрбэр, многоборьеҕа бэйэбин боруобаланар санааттан уонна дьоннор, табаарыстарым да этэллэриттэн быһаарыныы ылыммытым”, – диир Владислав Попов.
Саха сиригэр “Дыгын оонньуулара” күрэхтэһии маҥнай кыаҕын ыларын саҕана мадьынылар күннээбит эбит буоллахтарына, бүгүҥҥү күҥҥэ атах оонньууларын спортсменнара үгүстэр.
Нам улууһун ааттаан түһүлгэҕэ тахсыбыт Владислав үс төгүл үс түһүмэххэ 34,84 м ыстанан 2 миэстэҕэ тахсар; тутум эргииргэ 38-та эргийэн 49 миэстэ буолар; мас-рестлиҥҥэ 16-с миэстэ буолар; ох саанан ытыыга 5-с миэстэ буолар; 400 миэтирэҕэ 56,70 бириэмэни көрдөрөн биэтэккэ 23-нэн киирэр; хапсаҕайга 41-с миэстэ; таас көтөҕүүтүгэр 31-с миэстэ буолар. Уопсай түмүккэ биир дойдулаахпыт Владислав 167 очукуоланан 19-с миэстэҕэ тахсар. 56 эр бэрдин иһигэр 19 буолуу – үчүгэй көрдөрүү!
“Ааттаах-суоллаах спортсменнар мустубут түһүлгэлэрин ис-иһигэр киирдэххэ, сырыттахха тулалыыр эйгэтэ чыҥха атына тута биллэр. Эти-сиини уһугуннарар эрчиллиилэри оҥоро сылдьаҥҥын өйдүүгүн, сэрэйэҕин: күүстээх эйгэ, күрэхтэһии күүрүүлээх, тыҥааһыннаах тыына, ураты тыын.
Бэйэ икки ардыгар сыһыан. Эр дьон эр дьон курдук. Ханнык баҕарар күрэхтэһиигэ тахсар көстүү – хабырыйсан ылыы да ханна барыай!? Ол эрээри, сынньалаҥҥа барыларын сыһыаннара холкутаан, күлэ-үөрэ сылдьаллар диэбит курдук.
Көрүҥнэринэн этэр буоллахха, саамай ыарырҕатарым – тутум эргиир уонна 400 м сүүрүү. Холобура, тутум эргииргэ туох баар былчыҥҥын барытын үлэлэтэҕин. Тутум эргийэргэ аҥаардас тыынарга да ыарахан буолааччы. Сүүрүүгэ 400 м дистанция саамай ыарахан дистанциянан ааттанар. Чуолаан, бу икки көрүҥ киһи сэниэтин олоччу ылар көрүҥнэр диэн ааттыыбын.
“Дыгын оонньууларыгар” баар көрүҥнэри барытын чочуйуохха наада. Атыҥҥар үчүгэйбин диэн баран холкутуйдаххына сатабылын биллэн турар, мөлтүүр. Холобура, төһө да ыстаныыга, хапсаҕайга, маска бастыҥ буолбутун иһин, эрчиллиилэри оҥоро сылдьыахха наада”, – диэн санаатын үллэстэр Владислав Попов.
Харысхан Попов