Хамаҕатта нэһилиэгин олохтоох библиотеката уонна наставник сэбиэтэ Е.М. Шапошников аатынан орто оскуола алын кылаастарын уолаттарыгар уонна аҕаларыгар анаан библиотур күрэх ыыттылар. Хамаандаҕа 5 уол оҕо уонна биир аҕа киирэн, барыта 5 хамаанда кытыннылар.
Бастакынан, өй күрэҕэр саха сирин туһунан, уста кээмэйдэрин, уруу-аймах ааттарын, сахалыы өс хоһооннорун билиигэ эристилэр. Иккиһинэн, «Ат сүүрдүүтэ», «Балыктааһын» көрдөөх оонньууларга булугастарын, сымсаларын холостулар.
Түмүккэ, 1 м. — 2 кылаас, 2 м. — 1 кылаас, 3 м. 3 «б» кылаас хамаандалара буолбуттарын библиотекарь Марина Корякина кэпсиир. Кини этэринэн, Аҕа уонна Булчут күннэригэр анаммыт тэрээһини наставник сэбиэтэ этии киллэрэн, спонсордаан, ветеран библиотекарь Розалия Дунаевалыын ыыппыттар. Аҕалартан, эһэлэртэн Михаил Кириллин, Николай Иванов, Роман Полищиков, Михаил Ядреев, Петр Иванов кыттыбыттарын махтал суругунан бэлиэтээбиттэр.
Мария Винокурова