Нэһилиэк сайдар кэскилэ, инникитэ – ыччат

Тохсунньу 25 күнүгэр Хатырык нэһилиэгэр ыытыллыбыт “Түмсэр күн” улуус ыччатын форумугар Үөдэй нэһилиэгин ыччатын хамаандата, баһылык солбуйааччыта Николай Обутов, ыччаты уонна общественноһы кытта үлэ специалиһа Варвара Тимофеева салайааччылаах кыттыыны ылан кэллилэр. Форумҥа нэһилиэктэртэн бастыҥ ыччат түмсэн, патриотизм тыыныгар иитии-өйдөтүү хайысхатыгар биир санаанан түмсэн сомоҕо күнүн төрүттээтилэр.

Улуу кыайыы 80 сылынан Хатырык орто оскуолатын “Бастакылар хамсааһыннара” “Блокадная ласточка” аахсыйа чэрчитинэн сүрүн символы хас биирдии кыттааччыга туттардылар. Үөдэй нэһилиэгиттэн 12 ыччат биир хамаанда буолан нэһилиэк чиэһин көмүскээтилэр. “Импульс” патриотическай дьыалабыай оонньууга тутатына бырайыак суруйан көмүскээтилэр.

Үөрүүлээх тэрээһиҥҥэ ыччат политикатын эйгэтигэр кылааттарын уонна көхтөөх кыттыыларын иһин бастыҥ ыччаттарбыт бэлиэтэннилэр. Ол курдук, Нам улууһун баһылыгын бочуотунай грамотатынан Николай Обутов, махтал суруктарынан Лилиана Охлопкова – сынньалаҥ киин методиһа, Ньургустаана Прокопьева, Катерина Михайлова – уһуйаан үлэһиттэрэ, Надя Кельциева – устудьуонка, Ньургуйаана Павлова – олохтоох амбулатория терапевт-бырааһа, маны таһынан, СӨ Ил Түмэн ыччат, физическай култуура уонна спорт сис кэмитиэтин махтал суругунан Варвара Тимофеева наҕараадаланнылар.

2024 сыл түмүгүнэн бастыҥнар кэккэлэригэр “Активист года” анал аат Геннадий Игнатьевка туттарылынна. Геннадий “Сарыал” сынньалаҥ киин уус-уран салайааччыта, “Муус устар” өрөспүүбүлүкэтээҕи ыччат фестивалын кыттыылааҕа, VI өрөспүүбүлүкэтээҕи “Хомус тыына” күрэх кыайыылааҕа, “Саха-фест Балтика-2024” I Аан дойдутааҕы фестиваль 1-кы истиэпэннээх лауреата, Москва, Коломна куоракка ыытыллыбыт «Арассыыйа норуоттарын үйэлээх баайын матырыйаалынайа суох этнокултуурнай нэһилиэстибэтибэлэрин үйэтитиигэ ыытыллар үлэлэлэр» диэн норуоттар икки ардыларынааҕы форум кыттыылааҕа.

“Бастыҥ эдэр ыал” анал аат Дмитрий уонна Агния Яковлевтар дьиэ кэргэҥҥэ туттарылынна. Ыал аҕата Дмитрий Трофимович нэһилиэк депутата, ыал ийэтэ Агния Ивановна орто оскуолаҕа дириэктэри үөрэх чааһыгар солбуйааччы, “Ийэ кыыһынаан” өрөспүүбүлүкэтээҕи күрэх, “Миссис Эҥсиэли-2024” куонкурус кыайыылаахтара, дьиэ кэргэнинэн “Силис” уонна “Төрөөбүт дойдуга тапталы иитии” бырайыак ааптардара, спортивнай, култуурунай тэрээһиннэр көхтөөх кыттааччылара, нэһилиэккэ чөл олоҕу көҕүлүүр холобур буолар дьиэ кэргэн.

Бастыҥ ыччаттарбытынан киэн туттабыт, кинилэр ситиһиилэрэ, үлэҕэ-хамнаска, нэһилиэк олоҕор көхтөөх кыттыылара барыбытын үөрдэр – ол аата нэһилиэк сайдар кэскилэ инникилээх.

Екатерина Эверстова, Үөдэй

Читайте дальше