Никольскайдааҕы «Веснянка» оҕо уһуйаанын туһунан архыып докумуоннара кэпсииллэр:
- 1937 сыллаахха «Н.А. Каландаришвили» холкуоска Жильцова Анфиса сэбиэдиссэйдээх «Ясли» сезоннай площадка аһылла сылдьыбыт.
- 1941-45 сэрии сылларыгар С.М. Киров аатынан холкуоска «Арыы Кыынньарбыкка» оҕолорго анаан сезоннай площадка тэриллэн үлэлээбит.
- 1966-67 сыллаахха Никольскай бөһүөлэгэр 25 миэстэлээх уһуйаан Анна Борисова сэбиэдиссэйдээх үлэлээбит.
- 1989 сыллаахха 20 миэстэлээх саҥа уһуйаан «Веснянка» диэн ааттанан саҥалыы тыыннанан үлэтин саҕалаабыта.
Онтон ыла, номнуо, 35 сыл элэҥнээн ааһа оҕуста. Бу сыллар тухары 800-тэн тахса оҕо бу уһуйааҥҥа сылдьан, үчүгэйгэ-кэрэҕэ уһуйуллан билии-көрүү аартыгын арыйа, оскуола боруогун атыллаатаҕа.
Бу 35 сылтан 20 сыллаах үбүлүөйүн бэлиэтиир кэрэ кэмҥэ үлэтин-хамнаһын туһунан «Эҥсиэли» хаһыакка сырдатан турабын. Салгыы кэнники 15 сылга уларыйыы-тэлэрийии үлэтин, сайдыы хаамыытын сырдатыам.
Олох хаамыытынан уһуйаан үлэтэ тупсар, былаана кэҥиир, коллектив эдэримсийэр, ирдэбил күүһүрэр. Сэбиэдиссэйинэн Никольскай нэһилиэгин депутата Альбина Иванова, иитээччилэринэн Тамара Станиславовна, Надежда Кузьминична, иитээччи көмөлөһөөччүлэринэн Татьяна Ушницкая, Варвара Андросова, музыкальнай салайааччынан, спортивнай инструкторынан Зинаида Васильевна – Тупсууна, поварынан Наталья Протопопова, наставник Полина Степановна, прачка Мария Герасимова, сторожтар Татьяна Винокурова, Николай Иннокентьевич, рабочай, сторож Петр Иванов ситиһиилээхтик үлэлии-хамсыы сылдьаллар, оҕолорго үтүө сыһыаны саҕаллар, төрөппүккэ үтүө сүбэһит буолаллар.
Уһуйаан үлэтин сүрүн соругунан оҕо доруобуйатыгар, өйүн-санаатын тобулунарыгар күүс-көмө буолан сайыннарыы буолар. Көрүүтүн-билиитин, сатабылын таба тайанан сайыннарыы, куруһуоктарга дьарыктаан талааннарын арыйыы, таба туһанарга үөрэтии. Ол инниттэн үлэлэрин 5-6 көрүҥүнэн арааран күүскэ, ситиһиилэрдээх үлэлииллэр:
- Физкультуранан дьарык;
- Саҥарар тылларын сайыннарыы;
- Духовно-нравственнай;
- Эколого-патриотическай;
- Үлэнэн иитии;
- Коллективынан хамсааһыҥҥа такайыы.
Кыра оҕолор бары өттүнэн сайдалларыгар туһалаах хайысхалары тутуһаллар. Оҕолор личность быһыытынан сайдалларыгар анаан “Малышок” диэн театральнай студия, “Каляка-маляка” куруһуок, робототехника, “Күн оҕолоро” музыкальнай, “Сүүр-көт, ой-дай” спортивнай куруһуоктар ситимнээхтик үлэлииллэр. Бары бииргэ коллективынан үтүө сүбэнэн үлэлиир буоланнар оҕолорун да ситиһиилэрэ сөҕүмэр.
2022 сылтан ахтар буоллахха, XII международный LT-ONLNE конкурска “Созвездие талантов” – улуустааҕы конкурс, “Дети таланта” I истиэпэннээх лауреат, “Декоративно-прикладное искусство” жанр мода хайысхатыгар I истиэпэннээх лауреат – Пестрякова Виола, сал. Нератова Зинаида – Тупсууна, “Сааскы саҕахтар” улуустааҕы оҕо конкурсугар Колосова Сардаана Гран-При, сал. Зинаида Нератова – Тупсууна.
2023 с. “Эколята за раздельный сбор отходов и повторное использование материалов” Бүтүн Россиятааҕы уруһуй конкурсун кыайыылааҕа Алексеев Уруйдаан, призердар – Сергучева Регина, Никитин Рустам. “Сааскы саҕахтар”, конкурска “Веснянка” үҥкүү коллектива I степеннээх лауреат, сал. Нератова Зинаида – Тупсууна, “Мы этой памяти верны” улуустааҕы конкурска III степеннээх диплом, оскуола иннинээҕи үөрэх тэрилтэтин комплекснай спартакиадатыгар кыттыыны ылбыттара.
2024 с. “Здоровье глазами ребенка” улуустааҕы конкурска Алексеев Уруйдаан 2 миэстэ, Никитин Рустам, Герасимов Ильдар – I миэстэ, сал. Тамара Станиславовна. МБУ “Окружной центр народного творчества” ГО МБУ өрөспүүбүлүкэтээҕи конкурс, Дьокуускай к., культура дьиэтэ, “Горняк”, “Конкурс детских рисунков подарок маме” Кириллина Алита I степ. лауреат, Нератова Айлана I степ. дипломант, Дьяконова Алина I степ. дипломант, Герасимов Ильдар, III степ. лауреат, Семенова Юлиана III степ. лауреат, сал. Надежда Кузьминична. Алексеев Уруйдаан “Шахматное королевство” саахымакка улуустааҕы турнир III степ. дипломунан бэлиэтэммитэ, сал. Зинаида Нератова – Тупсууна. Бу курдук уһуйаан ситиһиилэрин өссө да үгүһү ахтан аһарыахха сөп.
“Веснянка” уһуйаан 35 сыллаах үбүлүөйүн бүтүн нэһилиэк үрдүнэн үөрэ-көтө ыллыбыт. Уһуйаан ис-тас көрүҥэ тупсубута, үлэ-хамнас күүскэ барбыта харахха быраҕыллар. Иһэ-таһа сырдаан, оҕо эрэ сайдарыгар, билэ-көрө улаатарыгар ананан тэриллибит муннуктарга киһи эрэ кэрэхсии көрөрө үгүс. Бу барыта уһуйаан коллектива төрөппүттэри кытта ыкса сибээстээхтик үлэлииллэрэ, талба талааннаахтар кыайа-хото туталлара харахха быраҕыллар.
Төрүттэрин олоҕун билиһиннэрэн “Балаҕан” муннук бэркэ толкуйданан чочуллубут. Сахалыы таҥастаах куукулалар, төрөппүттэр оҥорбут араас харысхал ойуулардаах хопполоро, мас, буор иһиттэр, олбохтор муннуктара киирбит киһи болҕомтотун тардаллар. Улуу дьоммут Максим Аммосов, Илья Винокуров тустарынан, “Наша гордость” СВО-ҕа сылдьыбыт Алексей Нератовка, Геннадий Черноградскайга анаммыт стендэлэр оҕо-дьон болҕомтотун тардардыы ыйаммыттар.
Уһуйаан профсоюзнай тэрилтэтэ нэһилиэк, улуус тэрийэн ыытар үлэлэригэр көхтөөхтүк кыттар, кэккэ ситиһиилэрдээхтэр. 2023 сыллаахха улууска ыытыллыбыт “Россия в сердце моем” ырыа конкурсугар кыттан II миэстэҕэ тиксэн грамотанан, улууска ыытыллыбыт үөрэх тэрилтэлэрин III группа уһуйааннарын икки ардыгар дартска комплекснай спартакиада көрүҥэр I миэстэни ылан грамотанан наҕараадаламмыттара. Никольскай библиотеката тэрийбит интеллектуальнай “Брейн-ринг”, Саха АССР тэриллибитэ 100, М.К. Аммосов төрөөбүтэ 125, Никольскайдааҕы киирсии 100 сылларыгар анаммыт “Знаешь ли ты историю родной Якутии” оонньууга кыттан I миэстэни ылан муҥутуур кыайыылаах дипломун ылар чиэскэ тиксибиттэрэ.
2024 с. “Веснянка” оҕо уһуйаана комплекснай спартакиадаҕа 2023-24 сылларга IV миэстэни ылан Бочуотунай грамотаны туппута, профком председателэ Зинаида Нератова – Тупсууна үлэтин үтүө түмүгэ. Ахсынньы 5 күнүгэр АКЦ-быт киэҥ уораҕайыгар үгүс киһи мустан “Веснянка” оҕо уһуйаанын 35 үбүлүөйдээх сылын үрдүк таһымҥа тэрийбиттэр. Сэбиэдиссэй эбээһинэһин толоро сылдьар Зинаида Нератова – Тупсууна сценарийын бэйэтэ коллективын кытта оҥорон, тэрийэн, үлэһиттэр дьоҕурдарын көрдөрөр быыстапканы И.С. Шарапов аатынан “Сир” музейын коллектива туруоран, күүс-көмө буолан, туох да астык үчүгэй үлэни-хамнаһы көрдөрөр, кэпсиир, элбэх махтал тыллара этиллэр дьоро киэһэтэ буолан ааста.
Дьон талаана сүрдээх. Маннык талааннаахтар уһуйааҥҥа үлэлиир буоланнар, оҕолорбут сайдар буоллахтара. Ыалдьыт да элбэх. Быыстапкаҕа бастыҥ миэстэни 90-с сылларга маҥнай аһыллан үлэлииллэригэр оҥостубут дидактическай матырыйааллара дьон болҕомтотун тарта. Уһуйааҥҥа үлэлээбит СӨ үөрэҕин систематын туйгуна, I категориялаах музыкальнай салайааччы Елена Нератова оҕолорго анаабыт хоһооннорун, ырыаларын кинигэлэрэ ууруллубуттар.
Дьоро киэһэ Никольскай аҕа баһылыга Уйгу Сайаан Айхан уолун эҕэрдэтинэн саҕаланна, наҕараадалары туттарда. Нэһилиэк дьаһалтатын аатыттан “За вклад в развитие Никольского наслега” бэлиэни Татьяна Винокуроваҕа, уһуйааҥҥа өр сылларга үлэлээбит бэтэрээннэргэ, үлэлии сылдьааччыларга грамоталары туттартаата.
Улуустааҕы үөрэх салаатын, оскуолаҕа киириэн иннинээҕи саастаах оҕолор отделларын начальнигын солбуйааччыта Светлана Спартаковна күндү ыалдьыт буолан кэлэн кытынна. Эҕэрдэтин тириэртэ, кэккэ үлэһиттэргэ наҕараадалары туттартаата. Полина Степановна “Почетный ветеран системы образования РС(Я)” бэлиэнэн, “За доблестный труд” Саха Өрөспүүбүлүкэтин профсоюзтарын федерациятыттан мэтээлинэн, “За вклад в развитие муниципального образования “Намский улус” бэлиэнэн Зинаида Васильевна – Тупсууна наҕараадаланнылар. Үөрэх министерствотыттан Бочуотунай грамотаны Мария Герасимова тутта. Тамара Станиславовна, Надежда Кузьминична, Евдокия Егоровна, Анна Алексеевна, Елизавета Михайловна Нам улууһугар үөрэхтээһин тэрилтэтиттэн Бочуотунай грамоталары туттулар.
“Нам улууһа” МТ баһылыгын Ю.И. Слепцов аатыттан Бочуотунай грамоталарынан үлэ бэтэрээннэрэ, Саха Өрөспүүбүлүкэтин үөрэхтээһиҥҥэ туйгуннара Федорова Т.П., Осипова Е.П., “Веснянка” оҕо уһуйаанын үлэһитэ Иванов П.Е. наҕараадаланнылар. Нам улууһун үөрэхтээһин тэрилтэтиттэн Альбина Петровна, Елена Петровна Бочуотунай грамоталарынан бэлиэтэннилэр. Наҕараадалары “Нам улууһа” МТ баһылыгын социальнай боппуруостарга солбуйааччы Протопопов Е.А. туттарда. “Веснянка” оҕо уһуйааныгар сылдьыбыттар, үлэлээбиттэр, төрөппүттэр ааттарыттан ахтыылар, эҕэрдэлэр этилиннилэр, бэлэхтэр туттарылыннылар.
Уһуйаан оҕолоро, үлэһиттэрин коллектива ыллаан-туойан, үҥкүүлээн дьоро киэһэни силигин ситэрэн, киэргэтэн биэрдилэр. Коллектив эдэр, үлэлииргэ-хамсыырга, айарга-тутарга баҕалаах, “саҥа, киэҥ-куоҥ, сырдык дьиэлэнэрбит буоллар, үлэбит-хамнаспыт кэҥиэ, далааһыннаныа этэ” диэн коллектив улахан баҕа санаалаах эбит.
“Оҥоһуу тыл олохсуйбат,
Ийэ тыл симэлийбэт,
Сүрүннэммит үлэ ыһыллыбат,
Олохсуйбут хамсааһын уостубат” – диэнинэн салайтаран, иннигит диэки сырдыкка, кэрэҕэ, санааҕытын саппаҕырдыбакка айаннааҥ! Айыҥ-тутуҥ! Ыччакка суолу сирдээн, күүс-көмө, үтүө сүбэһит буола туруҥ!
Т. НИКОЛЬСКАЯ