Тэрилтэбит “Аҕа дойдуну көмүскээччилэрин” күнүнэн, сыллата буолар спартакиадатын, үлэһиттэрбит олус күүтэллэр. Бу манна бары нэһилиэктэрбит уолаттара мустаннар көхтөөх, сытыы-хотуу, мөккүөрдээх хапсыһыылары көрдөрдүлэр.
Тэрийэр хамыыһыйа, судьуйалар сылын аайы күрэхтэри уларытан, тупсаран иһэллэрэ үөрүүлээх. Хас биирдии көрүҥ барыта ураты, мындыр өйү, күүһү, сатабылы ирдиир. Быйылгы спартакиадабыт Хатырык нэһилиэгэр буолан ааста.
Саҥа култуура дыбарыаһа киэҥэ, сырдыга, тупсаҕайа, үлэлиир, дьарыктанар усулуобуйата барыта баар эбит. Комплекснай эбиэппитин оскуола коллектива бэлэмнээн, тото-хана аһаабыппыт. Күрэхпит спортивнай саалаҕа буолбута. Элбэх, үлэһит, күүстээх уолаттар мустубуттара. Саала иһэ ньиргийэн олорбута, барыта биир санаанан, биир тыынынан ааспыта. Түгэнинэн туһанан Хатырыктааҕы култуура үлэһиттэригэр, оскуола коллективыгар улахан махталбытын тиэрдэбит.
Светлана Попова-Дайаана