Эҥсиэли хочотун чулуукан ыччата –
Хомустаах сириттэн тахсыбыт Ньургуммут!
Күн бүгүн ааттааммыт, эн дойдуҥ ыччата,
Саныыбыт, ахтабыт, дьулуурдаах Ньургуммут!
Кыһыҥҥы дьыбарга күн сирин көрөҥҥүн
Самныбат тулуурдаах эн, Ньургун, буолбутуҥ,
Тулалыыр айылҕаҥ кэрэтин сөҕөҥҥүн
Оҕо саас ымыылаах дьолунан туолбутуҥ!
Ааҕарга, суоттуурга баҕаран, тардыһан
Оскуола боруогун атыллаан киирбитиҥ,
Билиигэ-көрүүгэ дириҥник дьаныһан
Оскуола биир бастыҥ туйгуна эн этиҥ!
Өркөн өй күүһүнэн билиигин хаҥатан
Үрдүктэн үрдүгү дабайан ылбытыҥ,
Кэскиллээх олоҕу барҕардар санааттан
Үгүһү-элбэҕи ситиһэн кыайбытыҥ!
Эн, Ньургун, билэриҥ алмаас таас чаҕыла
Сахабыт сиригэр туһалыыр кыахтааҕын,
Эн, Ньургун, ол онтон барыһы аҕала
Өссө да ылсыһан үлэлиир кыахтааҕыҥ!
Эн бастыҥ депутат, спикер буолаҥҥын
Дьон-сэргэ туһугар сыраҕын биэрбитиҥ,
Үрдүкү салайар үлэҕэ тахсаҥҥын
Ырааҕы көрөөччү сүбэһит буолбутуҥ.
Төрөөбүт дойдугар эргиллэн кэлэргэр
«Үс сэргэ», ытык сир, эйигин көрсөрө,
Эҥсиэли хочотун үөһэттэн көрөргөр
Астыныы, дуоһуйуу абылыы кууһара.
Төрөппүт иитиитин, учуутал үтүөтүн
Махталлаах тылынан сылаастык ахтарыҥ,
Тулалыыр бар дьонуҥ үөрүүтүн-көтүүтүн
Эн тэҥҥэ үллэстэн мичээрдээн ыларыҥ.
Оо, Ньургун, чаҕылхай сулустуу күлүмнээн
Олохтон эрдэлээн барбытыҥ абатыан!
Оо, Ньургун, кытыастар күн күүстээх сандааран,
Бар дьоҥҥун сирдиэҕиҥ хаалбыта кыһыытыан!
Бу орто дойдуга дьолломмут күннэргин,
Дьулуурдаах, тулуурдаах кыайыылаах кэмнэргин
Куруутун саныахпыт, ахтыахпыт турдаҕа,
Эн ааккын ааттыырбыт салҕана туруоҕа!
Удьурҕай
Намҥа культура уонна спорт комплексыгар үлэлиир өрөспүүбүлүкэтээҕи оҕо спортивнай оскуолата Ньургун Тимофеев аатын сүгэр. 2023 сылга государственнай уонна политическай деятель төрөөбүтэ 60 сылыгар КСК тиэргэнигэр сквер аһыллыбыта.
2020 сыллаахха кулун тутар 13 күнүгэр Нам сэлиэнньэтигэр өрөспүүбүлүкэтээҕи Олимпийскай резербэ спортивнай оскуолатыгар Ньургун Тимофеев аата иҥэриллибитэ.
Ньургун Тимофеев 1963 сыллаахха олунньу 7күнүгэр учуутал дьиэ кэргэнигэр күн сирин көрбүтэ. Оҕо сааһа 1 Хомустаах нэһилиэгэр ааспыта. 1985 сыллаахха Саха государственнай университетын бүтэрбитэ. Салгыы Томскайдааҕы политехническай институт аспирантуратыгар киирбитэ уонна 1989 сыллаахха ситиһиилээхтик бүтэрбитэ. Бу сыл Томскайдааҕы физика уонна материаловедение институтун Сибиирдээҕи отделениетын ССРС Наукаларын Академиятыгар алын научнай сотруднигынан үлэлээн саҕалаабыта.
1991 сыллаахха «Туймаада Даймонд» хампаанньаҕа техническэй директорынан анаммыта. 1992 с. «СахаДаймонд» акционернай хампаанньа генеральнай директорынан буолбута. 1993 с. «АЛРОСА» диэн алмааһы атыылыыр саха тэрилтэтэ тэриллибитэ. Бу тэрилтэни директор быһыытынан 1996 с. диэри салайбыта. Салгыы Москваҕа «АЛРОСА» хампаанньа генеральнай директорын солбуйааччытынан үлэлээбитэ. 2000 с. РФ правительствотын иһинэн норуот хаһаайыстыбатын академиятын үөрэнэн бүтэрбитэ.
2005 с. ыам ыйын 19 күнүгэр Ил Түмэн Государственнай Мунньаҕар председателинэн талыллыбыта. 2012 сыл от ыйын 14 күнүттэн 2017 сыл тохсунньу 30 күнүгэр диэри Саха өрөспүүбүлүкэтин президенин көмөлөһөөччүтэ этэ.