Россияҕа Дьиэ кэргэн, Саха сиригэр Оҕо саас, Нам улууһугар Оҕо спордун сылларын чэрчитинэн, муус устар 11 күнүгэр Нам улууһун Партизан нэһилиэгин «Кустук» оҕо саадын оскуолаҕа киириэн иннинээҕи саастаах уолаттарыгар сыл аайы ыытыллар, үгэс буолбут «Үрүн Уолан – 2024» күрэхтэһии бэрт тэрээһиннээхтик уонна сэргэхтик ааста.
Кэнчээри ыччаппыт 5 көрүҥҥэ күөн көрүстүлэр: ырааҕы ыстаныы, мас тардыһыы, наартаны ойуу, ох саанан ытыы уонна 20 миэтэрэни бириэмэҕэ сүүрүү. Эриэ-дэхси түсүһүүлээх, тыҥааһыннаах күрэхтэһии түмүгүнэн муҥутуур кыайыылааҕынан тахсан, «Үрүн Уолан – 2024» үрдүк ааты Эрсан Петров ылла. Вася Колпашников – II миэстэ, Сахайаан Рыкунов – III миэстэ буоланнар кыайыы өрөгөйүн биллилэр.
Күрэхтэһиини нэһилиэк спорт саалын инструктора Дьулустан Христофоров судьуйалаан ыытта. Кыайыылаахтарга уонна кыттааччыларга бирииһинэн күүс-көмө буолбут «Партизан нэһилиэгэ» МТ дьаһалтатыгар (баһылык А.Н.Зырянов), «Хомус» фольклор дьиэтин үлэһиттэригэр (директор С.Г. Алексеев), олохтоох библиотекаҕа (сал. С.В. Шарапова), музейбытыгар (сэбиэдиссэй Сардаҥа Харысхал кыыһа) уонна Дьулустаан Денисовичка оҕо саадын үлэһиттэрэ барҕа махталларын тиэрдэллэр.
Полина Скрябина