СӨ Ил Дархана Айсен Николаев Ил Түмэҥҥэ Анал этиитигэр кэлэр 2024 сылы Саха сиригэр Оҕо саас сылынан биллэрдэ.
Нам улууһун Ленскэй нэһилиэгэр 648 элбэх оҕолоох, ол иһигэр: 3 оҕолоох — 384, 4 оҕолоох — 146, 5 оҕолоох — 91, 6 оҕолоох — 20, 7 оҕолоох 7 ыал баар. Оттон иитиэх оҕолордоох (оҕолоох) — 7, көрүүтэ-истиитэ суох хаалбыт оҕолору эпиэкэҕэ ылбыт 22 дьиэ кэргэн олорор.
Нам сэлиэнньэтин олохтооҕо, 10 оҕону көрөр-истэр, кэтэх хаһаайыстыбанан дьарыктанар Матрена Сивцева санаатын үллэстэр:
— Бүгүн СР Ил Дархана Айсен Николаев Сахабыт сиригэр Оҕо саас эрэ сылын биллэриэ диэн күүппэтэх бэйэм наһаа соһуйа, долгуйа, үөрэ иһиттим. Элбэх оҕолоох ыалларга бу үөрүүлээх сонун!
Олус сөптөөх быһаарыныы ылыллыбытыгар эрэнэбин. Аатыгар эрэ буолбакка, тустаах, чуолаан, доруобуйаларынан хааччахтаах, оҕолорго болҕомто ууруллан сөптөөх үлэлэр ыытыллаллара буоллар. Итини этэн туран, Ил Дархан ылыммыт быһаарыытынан сөптөөх үлэлэр барыахтара диэн эрэнэбит, үчүгэйи күүтэбит. Ил Дархаммытыгар Николаев Айсен Сергеевичка махтанабыт.
Харысхан Попов