Нам улууһун нэһилиэктэригэр таҥхаҕа аналлаах, таҥха ис хоһоонун кэпсиир тэрээһиннэр ыытыллан саҕаланнылар. Таҥха күннэригэр айылҕаттан айдарыылаахтар, чараас эйгэни кытта алтыһааччылар инникини көрүөн, билиэн баҕалаахтарга сүбэ-ама биэрэр, таайар үгэстээхтэр.
Оттон саха сиэрин тутуһааччылар оҕолорго “Таайтарыылаах Таҥха”, тохсунньу ый – Таҥха Хаан ыйа буоларын кэпсииллэр, билиһиннэрэллэр. Бүгүн улуустааҕы гимназия 8 кылааһын үөрэнээччилэрэ П.П. Ядрихинскай-Бэдьээлэ аатынан Намнааҕы Олоҥхо дьиэтигэр ыалдьыттаатылар.
Олоҥхо дьиэтигэр кэлбит 18 оҕоҕо дөһүөлдьүт Хордогосова Нина Иннокентьевна алгыс анаата. Гимназия үөрэнээччилэригэр үлэһиттэр тохсунньу туох ыйа буоларын, тугунан биллэрин сиһилии көрдөрөр, кэпсиир видео көрдөрбүттэр. Салгыы, тэрээһин кыттыылаахтара алгыс анаан, түөрэх бырахтаран, саха төрүт оонньууларын оонньоон күннэрин атаарбыттара этиллэр.
📸📹Роман Шапошников
Харысхан Попов