Дьиэ кэргэҥҥэ ыар буруйу оҥорууну сэрэтэр сыаллаах профилактическай үлэлэр мэлдьи ыытыллаллар. Саастарын ситэ илик оҕолор дьыалаларыгар уонна кинилэр бырааптарын көмүскүүр Ленскэй нэһилиэк иһинэн үлэлиир общественнай сэбиэт уонна “Берегиня” киин специалистара от ыйын саҥатыгар рейдэҕэ тахсыбыттарын олохтоох дьаһалта үлэһитэ Анна Слепцова иһитиннэрэр.
“Нам сэлиэнньэтин 25 ыалыгар сылдьаммыт кэпсэтиилэри ыыттыбыт. Рейдэ түмүгүнэн түөрт ыал ийэтэ уонна аҕата арыгылыыллара билиннэ”, – диир Анна Ильинична.
Оттон сокуоннай саастарын ситэ илик оҕолор буруйу оҥороллорун сэрэтэр сыаллаах түүҥҥү рейдэлэр сайын устата ыытыллаллара этиллэр. Ол курдук, сайыҥҥы кэмҥэ оҕо сокуоннай бэрэстэбиитэлэ суох общественнай сирдэргэ, уулуссаҕа киэһэ 23.00 чаастан сарсыарда 6.00 чааска диэри сылдьыа суохтаах. Ол эрээри, оҕолор түүннэри сылдьаллара тохтообот.
“Рейдэ оҥорор комиссия түүҥҥү бириэмэҕэ сылдьар оҕолорго акта толорор уонна төрөппүттэригэр тиэрдэр, сэрэтиллэр. Чопчулаатахха, түүҥҥү бириэмэҕэ тутуллубут оҕо ПДН учуотугар туруон сөп, төрөппүккэ административнай ыстараап оҥоһуллар.
Сайыҥҥы кэмҥэ оҕолор дьарыктаах буолууларыгар болҕомтобутун ууран үлэлиибит. Быйыл сервиснай этэрээт оҕолоро “Нам ыччата” диэн бырайыак чэрчитинэн, нэһилиэнньэҕэ эксперименнэри оҥорбуттара. Холобура, бэйэлэрэ толкуйдаабыт “Контрольная закупка” эксперименнарынан маҕаһыынтан табах, энергетическай утахтары ылан көрбүттэрэ. “Контральная закупка” түмүгүнэн, аҥаардас төрөппүттэр эрэ буруйдаах буолбатахтара арылаччы көһүннэ. Уопсастыба иитэн таһаарарын эмиэ умнумуохха. Эксперимент оҥорбут оҕолор атыылааччыларга паспордарын ыйыталларыгар этии киллэрбиттэр уонна маҕаһыыннарга 18 саастарын туола иликтэргэ табаҕы, бобуулаах утахтары атыылаамаҥ диэн листовка иилбиттэр.
Эппиэттинэһэ суох сыһыантан буруйу оҥоруу тахса турар — табах тардыыта, энергетическэй утахтары иһии. Улахан дьон «биһиги оҕолорбут буолбатахтар» диэн бэйэмсэх санааны өйтөн-санааттан быраҕыахха наада”, – диэн билиһиннэрэр Анна Слепцова.
Харысхан Попов