Кулун тутар 5 күнүгэр, Аппааны сэлиэнньэтин «Чороон» норуот айымньытын киинигэр, «Пути и проблемы решения по профилактике несовершеннолетних» диэн Нам улууһун хотугу зонатын саастарын ситэ илик оҕолору кытта үлэлэһэр общественнай сэбиэттэр сүбэ мунньахтара буолла.
Бу тэрээһин “Хатыҥ Арыы нэһилиэгэ” МТ уонна Намнааҕы ис дьыала отделын сүбэлэҥинэн ыытылынна. Мунньахха Бөтүҥ нэһилиэгин сэбиэттэрэ кытыннылар. Мунньах кыттыылаахтарын Оксана Лебедева, Варвара Слепцова регистрациялаатылар, Хатыҥ Арыы нэһилиэгэр саастарын ситэ илик оҕолору кытта үлэлэһэр комиссия үлэтин сырдатар анал буклеттары түҥэттилэр.
Хоту зонаҕа аан бастакынан ыытыллыбыт сүбэ мунньах Нам улууһун өрөгөй ырыатынан саҕаланна. Мунньахха уопсайа биэс боппуруос көрүлүннэ. Нэһилиэк баһылыга Иван Ноговицын иһитиннэриитин кэнниттэн, ПДН инспиэктэрэ Евдокия Спиридонова «Информация об административных правонарушений в Намском улусе за 2023 год», Нам улууһун КДН эппиэттээх секретара Яна Сыромятникова «Анализ работы КДН МО «Намский улус и основные проблемы в Намском улусе», Ленскэй нэһилиэк эппиэттээх секретара Анна Ильинична «Деятельность работы ОСПДН и ЗП», Хатыҥ Арыы нэһилиэк эппиэттээх секретара «Работа ОСПДН и ЗП Хатын-Арынского наслега» диэн иһитиннэриилэри оҥордулар. Салгыы санаа атастаһыыта, элбэх этиилэр киирдилэр. Ол курдук, Бөтүҥ нэһилиэгин баһылыгын солбуйааччыта Галина Маркова уонна хамыыһыйа чилиэнэ Людмила Михайлова, И.Е. Винокуров аатынан Хатыҥ Арыы орто оскуолатын дириэктэри иитэр үлэҕэ солбуйааччы Валентина Максимова этиилэри киллэрдилэр. Яна Сыромятникова мунньахха кэлбит комиссия чилиэннэригэр көрдөрөр-өйдөтөр матырыйаал түҥэттэ.
Дириҥ ис хоһоонноох кэпсэтии кэнниттэн, барыллаан оҥоһуллубут резолюцияны ылыннылар, ону тэҥэ саҥа этиилэри киллэрдилэр: арыгылааһын уонна таксикомания нэһилиэнньэҕэ, ыччакка үрдүүр кутталлааҕынан, межведомственнай былаан оҥорон бииргэ үлэлииргэ, үөрэх кыһаларыгар Нам оскуолаларын психологтара уонна Психологическай киин үлэһиттэрэ кыттыылаах «Психологическай десант» ыытары үөрэтэн, Үөрэх управлениетын былааныгар киллэттэрии, Нам улууһугар «Иитиини бүттүүн обществонан» общественнай хамсааһыны сөргүтэн күүстээх үлэ ыытыы, нэһилиэктэргэ ДНД –лары тэрийии, онно болҕомто ууруу, Нам улууһун КДН иһинэн эппиэттээх секретардарга анаан үөрэтэр сыаллаах семинардары ыытыы о.д.а.
Кэнчээри ыччаппыт, оҕолорбут чөл, бөҕө туруктаах, дьоллоох оҕо саастаах буолалларыгар бары биир киһи курдук үлэлииргэ бэлэмнэрин эттилэр.
Надежда Сивцева