Саҥа үөрэх дьыла саҕаланара ыйы кыайбат кэм хаалла. Үөрэнээччилэри саҥа саҕалааһыннар, кыайыылар-хотуулар күүтэллэр. Ол гынан баран, оҕо эрэ барыта, араас биричиинэнэн, үөрэх дьылыгар бэлэм буолбат. Маныаха көмөлөһөр аналлаах үгүс акциялар бааллар. «Берегиня» дьиэ кэргэҥҥэ иитиигэ көмө буолар киин Намнааҕы отделениета хаһыс да сылын «Помоги пойти учиться» диэн акция тэрийэн ыытар.
Мария Винокурова, «Берегиня» киин Намнааҕы отделениетын салайааччыта:
— Бүгүҥҥү күҥҥэ биһиги тэрилтэбит көрүүтүгэр-истиитигэр 81 ыал сылдьар, манна сокуоннай саастарын ситэ илик 238 оҕо баар. Ыарахан балаһыанньалаах дьиэ кэргэттэргэ аадырыстаах көмөнү оҥорор сыалтан, сыллата үөрэх дьылын чугаһыгар акция ыытабыт. Быйылгы тэрээһиммит кыра дохуоттаах, элбэх оҕолоох ыалларга көмөнү тэҥэ, анал байыаннай дьайыы кыттыылаахтарын оҕолоругар ананыаҕа. Киин специалистара ыалларынан сылдьан оҕолор үөрэх дьылыгар төһө бэлэмнээхтэрин быһаараллар, туох наадатын сураһаллар, төрөппүттэргэ материальнай көмө хайдах ылыахтарын сөбүн сүбэлииллэр, оскуолаларга ходатайство ыыталлар, докумуон толоруутугар көмөлөһөллөр.
Барыллаан ааҕыынан, атырдьах ыйын саҥатыттан биһиги специалистарбыт улуус үрдүнэн 32 ыалга сырыттылар. Кинилэр истэригэр саҥа үөрэх дьылыгар көмөҕө наадыйар 25 ыал баара билиннэ. 7-тэн 17 сааһыгар диэри оҕологохтор школьнай форма ылалларыгар көмөнү хайдах ылыахтарын сөбүн сүбэлээтибит, информация биэрдибит.
Ааспыт сылга социальнай партнердарбытын кытары оскуолаҕа үөрэнэр саастаах оҕолордоох 130 ыалга сылдьыбыппыт. Балартан 10-тан тахса ыалга оҕолоро саҥа үөрэх дьылыгар бэлэмэ суохтара быһаарыллыбыта. Сырыы түмүгүнэн, 37 ыалга үөрэх тээбиринэ ылыллыбыта, 34 дьиэ кэргэҥҥэ материальнай көмө (бородуукта) оҥоһуллубута. Биир оҕо оскуолаҕа киллэриллибитэ, икки ыалга социальнай контракт оҥоһулларыгар көмөлөспүппүт. Былырыын 20-тэн тахса тэрилтэ акциябытыгар кыттыспыта. Ол курдук: СӨ үп министерствота, «Сахатранснефтегаз» Намнааҕы салаата (А.Г. Новгородов), Намнааҕы РЭС (А.С. Васильев), «Якутскэнергосбыт» (О.Д. Кулаковская), «Эрэл» ТХПК (Нь.Ф. Гуляев), ветеринария управлениета (П.П. Окоемов), урбаанньыттар Н.Е. Молчанова. И.В. Терешкин, А.Г. Изюков, С.В. Макарова, «Ганза» ХЭТ («ИП Варакин М.В.») уо.д.а.
Күндү Нам улууһун олохтоохторо, урбаанньыттара, «Помоги пойти учиться» акциябытыгар көхтөөхтүк кыттыҥ диэн ыҥырабыт, оҕолорго үөрүүтэ бэлэхтээҥ.
Дьэ, бу курдук, үтүө санаа акциятыгар хас биирдии киһи кыттыан сөп. Оскуолаҕа аналлаах малы-салы, туттар тээбирини атырдьах ыйын 14 күнүттэн балаҕан ыйын 15-гэр диэри Нам сэлиэнньэтин Ленин аатынан уулусса 20-гэр бэнидиэнньиктэн бээтинсэҕэ диэри сарсыарда 9-тан киэһээ 6 ч. диэри туталлар. Көмө көрүҥэ араас буолуон сөп, холобура: канцелярскай табаар, кинигэ, тэтэрээт, рюкзак, школьнай форма о.д.а.
Киирбит көмө социальнай туруктарынан ыарахан, кыаммат балаһыанньалаах уонна анал байыаннай дьайыы кыттыылаахтарын оҕолоругар туттарыллыаҕа.
Лена НОГОВИЦЫНА, «Эҥсиэли» хаһыат