Олунньу 5 күнүгэр «Кыайыы Знамятын» Кэбээйилэртэн Нам улууһа тутуоҕа

Россия президенэ Владимир Путин Аҕа дойду Улуу сэриитигэр Кыайыы 80 сылынан 2025 сылы Аҕа дойдуну көмүскээччи сылынан биллэрбитэ. «Төрөөбүт дойдубут чиэһин көмүскүү сылдьар байыаннай дьайыы кыттыылаахтарыгар уонна Аҕа дойду Улуу сэриитигэр аҕаларбыт, эһэлэрбит хорсун-хоодуот быһыыларыгар ытыктабылбыт, сүгүрүйүүбүт буолар», — диэбитэ. Маныаха, ааспыт сыл ахсынньы 19 күнүгэр Ил Дархан Айсен Николаев Ил Түмэҥҥэ туһаайыытыгар бу сылы Саха Өрөспүүбүлүкэтигэр Ийэ дойдуну көмүскээччи сылынан эппитэ. Нам улууһугар Кыайыы сылынан биллэриллибитэ.

 

Саха сириттэн 62 тыһ. тахса киһи ыҥырыллан, уоттаах сэриигэ саа-саадах тутан дойду көҥүлүн уонна чиэһин турууласпыттара. Тыылга хаалбыттар кыайыы туһугар туох баар сыраларын ууран туран, утуйары-сынньанары умнан күнүстэри-түүннэри үлэлээбиттэрэ.

Нам улууһуттан Аҕа дойду сэриитигэр уопсайа 2561 киһи ыҥырыллан барбыт. Уоттаах сэрии толоонуттан кыайыы көтөллөөх 1143 киһи эргиллэн кэлэн дойдуларын сайдыытыгар үлэлээбиттэр-хамсаабыттар. 931 саллаат сэриигэ хорсуннук киирсиигэ сырдык тыына быстыбыт. Ол иһиттэн 538 киһи өлбүт, 393 буойун сураҕа суох сүппүт, 577 киһи олохтоммотох биричиинэнэн биллибэт.

Ил Дархан Айсен Николаев көҕүлээбит «Кыайыы Знамята» өрөспүүбүлүкэтээҕи эстафетата Саха сирин олохтоохторун геройдуу уонна хорсун буолуу өйдөбүллэрин үйэтитиигэ түмэр сыаллаах-соруктаах. Сыл саҕаланыаҕыттан Улуу Кыайыы бэлиэтэ 9 улууска: Мэҥэ Хаҥалас, Амма, Уус Маайа, Алдан, Уус Алдан, Чурапчы, Таатта, Томпо Өймөкөөн, Кэбээйи улуустарыгар сырытта. Олунньу 5 күнүгэр кэбээйилэр Нам улууһугар аҕалан туттарыахтара.

«Кыайыы Знамята» өрөспүүбүлүкэ бары улуустарыгар сылдьан, ыам ыйын 9 күнүгэр Дьокуускай куоракка тиийиэҕэ.

Семен Аргунов

Читайте дальше