Бүгүн М.К. Аммосов аатынан Культура дыбарыаһыгар Нам улууһун бизнес-инкубатордаах оскуолаларын Саҥа дьыллааҕы быыстапка-дьаарбаҥкалара буола турар.
Дьаарбаҥкаҕа 9 оскуола кыттыыны ыла кэлбит. Ол курдук Түбэ, Модут, Хатыҥ Арыы, Салбаҥ, 1 Хомустаах, 2 Хомустаах, Партизан, Нам 1-кы нүөмэрдээх оскуолалара уонна «Түөлбэ» оҕо киинэ бааллар.
Сарсыардаттан дьон тоҕуоруһа мустан сөҕө-махтайа сэргии көрөн, бэйэлэригэр туһалааҕы, чугас дьонноругар Саҥа дьыллааҕы бэлэҕи атыылаһа сылдьаллар. Оҕолор педагогтарын салайыытынан бэйэ оҥорбут оҥоһуктарын дьон-сэргэ сэҥээриитигэр таһаардылар.
Быыстапка-дьаарбаҥкаҕа Саҥа дьылга аналлаах оҥоһуктар, ас-үөл, бэлэх арааһа, мастан, фанераттан оҥоһуллубут кэлэр сыл бэлиэтэ Дракон харыйа оонньуурдара онтон да атын иҥин-араас эгэлгэ барыта баар.
«Бүгүҥҥү күҥҥэ бизнес-инкубатордаах оскуолалар улууска, өрөспүүбүлүкэҕэ, Бүтүн Россияҕа ыытыллар араас таһымнаах научнай-практическай конференцияларга, семинардарга, быыстапка-дьаарбаҥкаларга көхтөөхтүк кытталлар. Сыллата маннык хайысхалаах оскуолаларбыт элбээн иһэллэр. Ол курдук, билигин бу хайысхаҕа уопсайа 1000-тан тахса үөрэнээччини хабаллар. Кинилэр үбү-харчыны сөпкө туһаныыга үөрэнэллэр, урбаан идэтин билсэллэр ону таһынан идэҕэ туһаайар биир сүрүн тосхол буолар. Бу оскуолалар оҥорон таһаарар табаардара, маллара-саллара, астара-үөллэрэ «Сделано в Намском улусе» брендбук быһыытынан билиниллэр», — диэн Намнааҕы үөрэх управлениетын начальнигын үөрэхтээһин хаачыстыбатыгар солбуйааччы Егор Бочонин санаатын үллэһиннэ.
«Буойун» түмсүү салайааччыта, улуус сэбиэтин депутата, Хатыҥ Арыы орто оскуолатын директора Павел Оконешников түмсүүтүн уонна улуус депутаттарын аатытыттан бу тоҕус оскуола байыаннай дьайыыга сылдьар биир дойдулаахтарбытыгар киллэрбит кылааттарын этэн туран махтал сурук туттартаата.
Маннык быыстапка-дьаарбаҥка иккис төгүлүн ыытылла турар. Инникитин үтүө үгэскэ кубулуйан сылын аайы ыытыллар тэрээһин буолуоҕа диэн бэлиэтээн эттилэр. Дьаарбаҥка бүгүн күнүс 1 чааска диэри буола турар.
Семен Аргунов